SAL7711, Act: R°238.1-V°238.1 (73 of 138)
Search Act
previous | next
Act R°238.1-V°238.1  
Act
Date: 1409-03-18

Transcription

2020-12-13 by Marijke Gevaert
Dit sijn de vorwarde(n) die gesciet en(de) en(de) gevorw(er)t sijn/
tusschen he(re)n steve(n) vand(er) nederalphen? hoeghe rentmeest(er)/
van braba(n)t op deen side en(de) pauwelse boudens van bierbeke/
vande(n) goeden des vors(creven) he(re)n stevens belege(n) te bier berghe(n)/
inde p(ro)chie van bierbeke die hi v(er)crege(n) jege(n) heeft heeft/
jege(n) arnde lombart geliker wijs de selve arnt die/
houdende welc
Welc goede de vors(creven) pauwels jege(n) den/
vors(creven) he(re)n steve(n) genome(n) heeft te wynne(n) van half m(er)te/
naest lede(n) tot ene(n) t(er)mine van vi ja(r)en lanc deen nae dand(er)/
staphans volghende/
Inden yersten sal de vors(creven) wynne de wynnende lande hebben en(de) wynne(n) de vors(creven) wynnende/
lande elx jaers hie(re)n binne(n) op helicht vande(n) coren ende vrucht dat daer jaerlex op wassen/
En(de) als men dat core(n) inden bant is sele sal des die vors(creven) wynne des vors(creven) stevens helicht/
inde scuer aldaer vuere(n) eer hi tsine ruere(n) sal moeghen/
En(de) toexst als men dat core(n) in doen sal soe sal de vors(creven) steve(n) ene(n) bode daer bi seynde(n)/
en(de) dien sal de vors(creven) wynne den cost gheve(n)/
Ende als de vors(creven) steve(n) sijn coren aldaer wille doen dersschen soe sal de vors(creven) wynne/
den dersscher den cost gheve(n) ende de vors(creven) steve(n) de dachue(re) ende daer voe(r) sal de vors(creven) wynne/
caf stroe en(de) crientsen van des vors(creven) stevens helicht hebben ende behoude(n)/
Ende als des vors(creven) stevens helicht gedersschen is soe sal hem de vors(creven) wynne tcore(n) daer/
af te love(n) leve(re)n mer de selve steve() sal dweghe gelt te love(n) daer af betalen/
Voert sal de vors(creven) wynne die beemde ende eeusele(n) aldaer ende de weyde vande(n) boeg(ar)t/
jaerlex hie(re)n binne(n) om xviii gulden hollansche (et)c(etera) te sente m(er)tens misse inde(n) wynt(er)/
te betalen/
Oec sal de vors(creven) wynne En(de) alle doeft dat daer jaerlex den vors(creven) t(er)mine dueren(de)/
wassen sal daer af sal de vors(creven) wynne deen derdeel hebben de en(de) steve(n) dand(er) twee/
derdeel uutgesceiden doeft dat steet int vors(creven) hof buite(n) den grote(n) boeg(ar)t dat sal/
de vors(creven) wynne jaerlex alleen hebben en(de) elc beyde vande(n) vors(creven) steve(n) ende de wynne/
sal sijn deel vande(n) selve(n) oeft doen lesen m(er) de vors(creven) wynne sal des vors(creven) stevens/
gedeelte lese(r) den cost gheve(n) en(de) den vors(creven) steve(n) sijn tweederdeel vande(n) vors(creven) oeft/
te jaerlex te love(n) leve(re)n/
Ende de vors(creven) steve(n) ende de wynne sele(n) jaerlex buyte(n) den vors(creven) hove copen/
dats te wete(n) steve(n) xl mandelen [rogge(n)] stroes ende de wynne xxv mandele(n) rogge(n) stroes/
en(de) die dwelc de vors(creven) wynne int vors(creven) hof hale(n) sal ende dat [stroe] daer in ette(n) met/
sine(n) beesten
en(de) alle dande(r) stroe dat vande(n) vors(creven) goede(n) come(n) sal dat selve sal de/
voerg(enoemde) wynne int vors(creven) hof met sine(n) beesten ette(n) en(de) mest daer af maken en(de) dat/
wed(er) op tvors(creven) lant [vuere(n)] slands meest p(ro)fite uutgenome(n) dat de vors(creven) wynne int leste/
ja(r)e dmest niet vorde(r) uut vuere(n) sal anders dat voe(r) ons(er) vrouwe(n) liechtmisse dach/
gemaect sal sijn
//
Voert es vorwarde dat de vors(creven) wynne alle ja(r)e int vors(creven) hof leve(re)n sal lx mandele(n)/
walmers om die huysinge daer mede te decke(n)/
Oec es ondersproken soe wa(n)neer men da soe wa(n)neer men daer van oude(n) [aen doude] werck(e)?/
doet plecken of decken dat daer af de vors(creven) wynne den wercliede(n) de cost gheve(n)/
sal en(de) de wynn steve(n) de dachue(re)/
Ende de vors(creven) wynne en sal gheen recht hebbe(n) inde(n) bossche aldaer and(er)s dan hi/
sijn p(er)de daer op sal moeghen laten [gaen] ten derde ja(r)e/
Ite(m) sal de vors(creven) wynne voe(r) uut behoude(n) alleen tot sine(n) p(ro)fite den vors(creven) t(er)mine/
duerende sond(er) steve(n) doer enich recht in te hebben een dachmale lants belege(n)/
inde(n) voerhof/
Ende de vors(creven) wynne sal de vors(creven) lande late(n) wynne(n) w(er)ve(n) en(de) meste(n)/
wel en(de) loflec gelijc sine(n) reengenote(n) en(de) die late(n) gelijc hier nae volght/
dats te wete(n) de vroemeer met rogge besayt op vier tideghe vore(n) en(de)/
alle dand(er) lant om gedaen op een vore En(de) alle dese vors(creven) vorw(er)de(n)/
geloefte(n) ende condicie(n) hebbe(n) de vors(creven) steve(n) en(de) de wynne deen den ande(re)n/
vast (et)c(etera) En(de) hier af is borghe des vors(creven) pauwels gielijs van bierbeke que(m)/
indempnab(it) cor(am) porta rike m(ar)tii xviii a(n)no xiiii[c] en(de) viii
ContributorsMi-Je Van Gils
Moderated byMi-Je Van Gils
Last update: 2017-03-28 by Xavier Delacourt