It(em) het es come(n) inde banc voe(r) meye(r) en(de) scepen(en) van loeven jan/ putkers gehete(n) jan deyns van brecht [porte(r) van loeven] daer de vorscr(even) meye(r)/ van loeven te hem wart een aensprake dede seggende dat/ de vorscr(even) jan d putkers voermaels doen hi een scouth(eit)/ was te brecht gevange(n) hadde ene(n) pet(er) heylen voe(r) scout/ daer af jan de vette(re) hem v(er)socht te vo(n)nisse en(de) te recht/ gestelt te werden inde banc te brecht des hem de vorsc(reven)/ jan putkers ontseyde en(de) en woude des niet doen Seggende/ voert de vorscr(even) meye(r) van loeven dat de selve jan/ putkers daer aen gebroect heeft [tot o] ene(n) wech tot s(int)/ jacobs of tot rochemadou of alsulke(n) bet(er)nisse als de scepen(en)/ van loeven(e) wisen soude aengesien dat me(n) elk(er)malken inde/[goede(n) lande van braba(n)t] sculdich es vo(n)nis en(de) recht te doen diet v(er)suect in de/ banc daer hi gevangen es Op dwelc hem de vorscr(even)/ jan putkers v(er)antworde en(de) seyde dat hem de vorscr(even)/ aensprake gheen onstade doen en soude en(de) dats bi deser redene(n)/ al wart also dat de vorscr(even) jan deyns den vorscr(even) pet(er) gevangen/ hadde soe en hadde hi nochtan daer aen niet gebroect biden/ redene(n) hier na bescreve(n) Want een clement drossate der/ vrouwe(n) van liedekerke die ov(er)ste was des vorscr(even) jan putkers/ den vorscr(even) jan [peter] heylen aensprac en(de) houden dede van eenre/ seke(re) so(m)men gelts die hi van eenre molen die hi jegen der/ vrouwen van liedekerke de pacht genome(n) hadde sculdich/ was de welc de vorscr(even) pet(er) heylen kendde en(de) h lijdde/ alsoe dat de vorscr(even) dross(ate) des vorscr(even) jans ov(er)ste geloefte/

/ den vorscr(even) pete(re)n sette indes vorscr(even) jans huys en(de) de selve/jan en(de) pet(er) dede geloefte dat hi nu(m)m(er)meer uut dien/ huyse sceiden en soude hi en soude den vorscr(even) dross(ate) tot/ der vrouwe(n) van lyedekerke behoef geno[e]ch gedaen hebben vand(er)/ scout vorscr(even) en(de) beval voert de vorscr(even) dross(ate) den vorscr(even)/ janne dat hi den vorscr(even) pete(re)n nu(m)m(er)meer uutlaten en soude/ hi en hadde der vorscr(even) .... vrouwe(n) van lyedekerke yerst/ gnoech gedaen en(de) dede de selve jan daer op ene(n) brief
//
lese(n) besegelt mette(n) segele der ma(n)ne(n) van santhove(n) daer/ in alle besceit en(de) handelinge vande(n) vorscr(even) stucke(n) begrepe(n)/ was Alsoe dat de scepen(en) van loeven(e) nae alle besceit dat/ daer af voe(r) hen v(er)redent waert biden meye(re) van loeven(e) hier/ op gemaent worde(n) die wijsden voe(r) een vo(n)nisse na aensprake/ na v(er)antworde en(de) na alles dats voe(r) hen come(n) was/ dat de vorscr(even) jan putkers ongehoude(n) soude sijn van/ alsulk(er) [aen]spraken als de meye(r) van loeven(e) tot hem wart/ gedaen hadde Cor(am) tymple nethenene(n) muylke ouder(ogge)/ maii vii