Het zijn comen in recht voe(r) meye(r) ende scepen(en) van loeven inde banck ald(aer)/ adriaen van hondert als brueder en(de) naeste erfgename peters wilen van/ hondert die uut macht van scepen(en) [brieve(n)] van loeve(n) comen was tot den goede(n) hier/ na bescreve(n) in deen side en(de) henricke vanden gehuchte van wambeke in dande(re)/ Inde(n) yerste(n) tot den hove gelege(n) te wambeke mette(n) woeningen huysen hoven/ bogarden grachte(n) metten lande gehete(n) belyke mette(n) lande acht(er) den bogart/ en(de) mette(n) langen meers te gad(er) metten eeusele gehete(n) ov(er) de beke liggende/ naest den hove voirscr(even) en(de) met allen ande(re)n sinen toebehoirte(n) houdende te gade(r)/ vi(½) boende(r) en(de) xlv roeden gelege(n) tusschen de strate geheten de cautsye en(de) de/ goede der begarde(n) van bruessel aen deen side en(de) de goede peters wile(n) coker/ in dande(r) Ite(m) tot ene(n) dachmael en(de) liiii roeden lants gelege(n) te wambeke/ opten werst en(de) bide cautsye tusschen de selve cautsye en(de) jans wile(n) van name(n)/ It(em) tot ene(n) dachmael en(de) lvi roede(n) lants gelege(n) op tselve velt tusschen de strate/ en(de) jans wilen goedenoy Ite(m) tot ene(n) halven boender en(de) xvi roeden lants gelege(n)/ ald(aer) op thorenvelt tusschen de goede d(er) beg(ar)den van bruessel en(de) claes lant/ vande(n) broeke It(em) tot ene(n) dachmael en(de) lxi roeden lants gelege(n) opt selve velt/ tussche(n) de goede henrics keghel en(de) de goede jans de becke(re) It(em) tot ene(n) dach(mael)/ lants gelege(n) inde p(ro)chie vand(er) vat bi stevorde inde lange meers tussche(n) de horst/ en(de) de goede jans vande(n) b(er)ghe It(em) tot ene(n) dach(mael) en(de) lvi roeden beemds gelege(n)/ in enen beloc bide verkensmeers tussche(n) de goede gielijs zoerbier en(de) de/ goede der vrouwen vanden spiker Ite(m) tot lxxviii roede(n) beemds gelegen/ bi sente mychiels bornken tussche(n) de beke en(de) de goede gielijs coker It(em) tot/ vijftich roede(n) beemds gelege(n) acht(er) thof jans wile(n) py(n) pe(n)ninc tussche(n) de goede/ des selfs wile(n) jans en(de) de goede goerts beckers It(em) tot den reysvyve(re) hou/ dende een dach(mael) en(de) liii roede(n) gelege(n) bide cautsye It(em) tot ii hoydaghe/ erflic tsijs en(de) xl placke(n) brabants gelts payme(n)ts op ene(n) beemdt des vors(creven)/ gielijs zoerbiers gelege(n) te stevorde in p(ro)chie vand(er) vat bide cautsye Ite(m) tot/ iiii capuyne(n) out tsijs en(de) x l(i)b(ra) en(de) x s(tuvers) payme(n)ts jaerlex tsijs op huys en(de)/ hof jans brieders gelege(n) te wambeke tusschen de strate en(de) de goede gielijs cok(er)/ It(em) tot viii ouden groten en(de) iiii cap(uynen) op lxxx roede(n) beemds leens goerts/ peten gelege(n) ald(aer) bide(n) goeden des selfs wilen goerts peeten daer de vors(creven)/ adriaen versocht aende(n) meye(r) van loeven datmen hem houde(n) woude/ na inhebben van sinen voirs(creven) scepen(en) brieve(n) van loeven inde goede voirscr(even)/ want hem die na inhebben van sinen voirs(creven) scepen(en) brieve(n) van loeven/ sculdech wae(re)n te volghen Dit gedaen dede [de] voirs(creven) henric vand(er) gehucht
//
met sine(n) gelev(er)den voerspreke een aensprake tot de(n) voirs(creven) goede(n) seggende/ dat hi tot de(n) selve(n) goeden voe(r) hof en(de) he(re) comen wae(re) met alle(n) punte(n) va(n)/ rechte en(de) dat dat wae(re) waer dat boet hi te thoene(n) also hi dat sculdech/ wae(re) te thoene(n) etc(etera) met meer ande(re)n redene(n) die hi daer toe vueghde Op/ dwelc de voirs(creven) adriaen wed(er) antw(er)de seggende dat hem dat gheen/ ontstade doe(n) en soude en(de) dat bi des(er) redene(n) want peter wile(n) van houdert/ sijn brued(er) tot de(n) voirs(creven) goede(n) come(n) wae(re) met scepen(en) brieve(n) van loeve(n)/ beg(ri)pende dat jan en(de) mychiel de coker gebruede(re) inde voirs(creven) goede gegoedt/ hadden jannes vande(n) hove clerc die de voirs(creven) goede voert voe(r) scepen(en) va(n)/ loeven erflic uutgaf den voirs(creven) wilen pete(re)n van houdert de welke brieve/ de voirs(creven) adriaen ald(aer) inde(n) rechte dede lesen En(de) seyde voert de voirs(creven)/ adriaen dat hi wittich brued(er) wae(re) des voirs(creven) wilen pet(er)s van houdert en(de) dat/ de selve wilen pet(er) sijn brued(er) na der tijt dat hi tot de(n) voirs(creven) goede(n) come(n) was/ de voirg(enoemde) goede aenveerdde hantplichte en(de) besat als sijn erve en(de) d(aer) uut/ starf als uut sine(n) erve en(de) dat dat beyde wae(r) was dat boet de voirs(creven)/ adriaen te thoene(n) en(de) mette(n) minsten etc(etera) versocht d(aer) o(m)me de voirs(creven) adriaen/ den meye(r) van loeve(n) na thoe(n)nisse dat hijs boet dat hi de(n) voirs(creven) henricke/ vande(n) gehuchte indien hebben woude dat hi sijn hande dade vand(er) helecht/ vanden goede(n) voirs(creven) Op dwelc de meye(r) van loeven maende de scepen(en)/ van loeven die wijsden voe(r) een vonnisse beyde de p(ar)tien tot hae(re)n thoe(n)nisse/ en(de) dae(re)n teynden recht daer na heeft de voirs(creven) adriaen gethoent met/ ene(n) openen placcaet der stat van bruessel en(de) met twee ande(re)n goede(n)/ ma(n)nen dat hi wettich brued(er) was des voirs(creven) wilen peters van houdert/ voert thoende hi met goede(n) ma(n)nen dat de voirs(creven) wilen peter ye sijnt/ na dat hi tot den voirs(creven) goede(n) come(n) was de voirs(creven) goede besat als sijn erve/ en(de) daer uut starf als uut sinen erve Voert dede noch de voirs(creven) adriaen/ lesen den voirs(creven) scepen(en) brief van loeven daer mede de voirs(creven) wilen pet(er)/ sijn brued(er) tot den voirs(creven) goeden comen was En(de) na desen thoende de/ voirs(creven) henric vande(n) gehuchte dat jan en(de) mychiel de coker gebruede(re) q(ua)men/ met scepen(en) van wambeke tot bruessel tot der weduwe(n) des voirs(creven)/ wile(n) peters en(de) ontgoedden hen vande(n) goede(n) voirs(creven) bi consent der/ weduwen voirs(creven) en(de) goedden daer in den voirs(creven) henricke vande(n) gehucht/ en(de) thoende voert de voirs(creven) henric dat de scepen(en) van wambeke die/ daer voe(r) ogen stonden borghe bleven voe(r) mech tgebrec vande(n) gelde/ mids datme(n)t aen henricken niet houden en woude Oec dede de
//
voirs(creven) henric sine(n) voirs(creven) getugen die scepen(en) van wambeke wae(re)n vragen oft/ niet een recht en wae(re) inde banc van wambeke so wie thien jae(re) en(de) een/ gougedinghe in e(n)nige goede geseten hadde dat hi daer in sculdech wae(re) te blive(n)/ Daer op de voirs(creven) scepen(en) van wambeke seyden dat si bleven bi alsulke(n) scepen(en)/ brief van wambeke als de voirs(creven) henric daer dede lesen begripende dat/ de voirs(creven) jan en(de) mychiel de coker gebruede(re) den voirs(creven) henricke inde voirs(creven)/ goede voe(r) meye(r) ende scepen(en) van wambeke na dat si hen voe(r) meye(r) en(de)/ scepen(en) van loeven ontgoedt hadden gegoedt heeft Op dwelc/ de scepen(en) van loeven vanden meye(r) van loeven ghemaent sijnde wijsde(n)/ voe(r) een vonnisse dat alsulken aensprake als de voirs(creven) henric vanden/ gehuchte gedaen hadde tot den voirs(creven) goeden den voirs(creven) adrianen en(de)/ sine(n) brieve(n) gheen ontstade doen en soude cor(am) johanne de borch/ oven ludovico roelants johanne de oppendorp waltero pynnoc/ iuniore arnoldo vynck johanne de hugarden et dyonisio boys/ scabinis lovanien(sibus) Dit geschiede en(de) was gedaen des/ sat(er)daighs xxi dage in augusto int jae(re) m cccc en(de) xxviii
//