Item henric de welde van lovenjoul soen henrics wel gords swelden/ in jegewordigheit der scepen(en) van loven gestaen heeft genomen en(de)/ bekent dat hij genomen heeft van roelove vrancs thoff en(de) goede/ des selfs roelofs geheten ter byest gelegen te cortbeke over loe en(de)/ daer omtrent in huysen hoven wynnenden landen beemden eeussele(n)/ bogarden en(de) allen hue(re)n toebehoirten Te houden te hebben ende/ te wynnen van halfmeerten nu neestcomen(de) enen t(er)mijn van sesse/ ja(r)en langc deen na dander staphans sonder myddel volgende/ elcs jairs hie(re)n bynnen Te weten de voirs(creven) wynnende lande o(m)me/ en(de) voer tween(en)veertich mudde rox goet en(de) payabel met wa(n)ne/ en(de) met veede(re)n wel bereyt der maten van loven En(de) de voirs(creven)/ beemde eeussele en(de) weyden omme twintich gulden(en) te weten/ xl pl(a)c(ken) voer elken gulden gereeckent Te betalen te weten tvors(creven)/ coren tsente andries misse appostels en(de) te loven te leve(re)n Ende/ tvoirs(creven) gelt tsente mertens misse inden wynter alle jare den voirs(creven)/ t(er)mijne due(re)nde en(de) telken t(er)mijne als vervolghde schout Item sal/ alsmen tfroyt inden bogart vanden voirs(creven) hove wassen(de) lesen sall/ so sall de voirs(creven) roeloff den lesers hue(r) dachue(re)n betalen en(de) de voirs(creven)/ henric sall hen den montcost gheven en(de) dat gedaen sullen de/ voirs(creven) roelof en(de) henric dat froyt deylen half en(de) half en(de) dan sall/ henric roelove sijn helcht daer aff te loven leve(re)n daert roelove/ genuegen sall en(de) sonder des selfs roelofs cost Item sullen de voirs(creven)/ roelof en(de) henric jairlix int voirs(creven) hoff leve(re)n te weten de voirg(enoemde)/ roelof l mandelen stroes en(de) de voirs(creven) henric xxv mandelen en(de)/ o(m)me dat int voirs(creven) hoff te sliten met sinen beesten en(de) dair aff mest/ te maken tot tslants profite en(de) so waer de voirs(creven) roelof de voirs(creven)/ sijn mandelen stroes coept [omtrint loven] daer salse de voirs(creven) henric op sinen/ cost moeten halen Item sall de voirs(creven) wynne alle ja(r)e int voirs(creven) hoff/ moeten leve(re)n ii[c] goeder custba(r)e walme(re) o(m)me de huysinghe des selfs/ hoefs daer mede te decken Item sall noch de voirs(creven) wynne de/ huysinge vanden voirs(creven) hove wael en(de) loflic houden vander underster/ rikelen nederwaert En(de) offt vanden beesten des voirs(creven) wynnen e(n)nige/ wande gebroken worden so soude de voirs(creven) wynne die moeten
//
wed(er) op sinen cost doen maken Es oec vurw(er)de so wa(n)neer men anders/ inden voirs(creven) hove ty(m)mert plect dect oft werct aende voirs(creven) huysinge/ dat dan roeloff den wercluden hue(r) dachue(re)n betalen sall en(de) de wynne/ sall hen den montcost gheven Item sall de voirs(creven) wynne den voirs(creven)/ roelove alle ja(r)e den voirs(creven) t(er)mijn due(re)nde viii corweyden doen Item/ sall de voirs(creven) wynne alle verdroechde willeghen en(de) ande(re) boeme/ die v(er)droecht sijn moeghen affhouwen en(de) berringhe daer aff maken/ op also dat hij voer elken verdroechden boem een levende pote/ vanden selven arde opte voirs(creven) goede setten sall Item sall de/ voirs(creven) willighe wynne de willighen omtrint den voirs(creven) goede stae(n)de/ en(de) ande(re) boeme diemen gewoenlic is te truncken te behoirliken/ tide mogen truncken o(m)me daer aff lueck te maken en(de) de goede/ voirs(creven) daer mede te bevreden daer sijs te doen hebben [en(de) oec berringe d(aer) af te maken] Item sall hij/ oec de voirs(creven) goede wael en(de) loflic beheymen daer des te doen/ es het sij met grechten op te graven oft anderssins gelijc sinen/ reengenoeten boven en(de) beneden Item oft de voirs(creven) wynne de voirs(creven)/ lande mergelen woude so soude roelof hem den mergel opte cuyle/ moeten leve(re)n op sinen cost Item sall oec de voirs(creven) roelof den voirs(creven)/ wynne alle ja(r)e den voirs(creven) t(er)mijn due(re)nde geven v ellen alsulcs/ wullens lakens Item sall de voirs(creven) wynne alle tstroe vanden/ voirs(creven) goeden comen(de) int voirs(creven) hoff bringen en(de) dat etten en(de) sliten met/ sinen beesten en(de) dair aff mest maken en(de) dat vue(re)n op tvoirs(creven) lant tslants/ meesten profite Item sall de voirs(creven) wynne de voirs(creven) lande wel en(de)/ loflic gewonnen en(de) geworven laten ten afsceiden vanden voirs(creven)/ sinen t(er)mijne gelijc hij die vant tot sinen aencome(n) te weten/ den wynt(er)art met rogge besaeyt op iiii getidege voren en(de)/ den zomerart eens o(m)me gedaen en(de) de brake oec eens/ o(m)me gedaen En(de) alle dese vurw(er)de(n) geloeften en(de) (con)dicien hebben/ geloeft de voirs(creven) p(ar)tien elc den ande(re)n wael en(de) volcomelic te/ houden en(de) te voldoen (et)c(etera) H(ier) aff sijn borgen des voirs(creven) wynnen als/ p(ri)ncipale sculde(re)n ongesundert gord de welde voirs(creven) sijn vader/ gord de melte(re) wonen(de) toverloe en(de) goessen tielens wonen(de) te/ he(re)ndale P(ri)mus oppend(orp) boen no(vem)[bris] quinta