Item na dien dat de abdt van everbode hem beclaeght en(de)/ becroent heeft voer de stat van loven dat de goede liede van/ duerne bij dyest hem en(de) sinen godshuyse ongebruyck deden aen/ twee beemde bynnen duerne gelegen Te weten den wuwer/ beemt en(de) den willekensdonck in dien dat hij en(de) sijn wynnen de/ voirs(creven) twee beemde van halfmeerte tot sente mertens misse toe/ altijt ghesloten en(de) bevreedt gehouden hadde het sij dat sij die/ etten oft maeydden en(de) dat boet de voirs(creven) abdt te thoenen/ Ende v(er)socht daer omme de voirs(creven) abdt dat hij in sijnre possessien/ na den lantrechte gehouden mocht werden So es comen dat/ de raet vander stat van loven den voirs(creven) abdt op deen zijde en(de)/ de goede liede van duerne op dande(re) voer hen als de naeste/ hoedstat en(de) daer onder de voirs(creven) goede liede van duerne als/ onder thoetvo(n)nisse van loven geseten sijn tot eenen zeke(re)n dage/ dach besceiden hebben elken sijn besceit en(de) thoenisse daer op te/ doen Ten dage van thoenissen hebben beide de p(ar)tien voirscr(even)/ hue(re) thoenissen en(de) waerheiden geleidt gelijc de raet va(n)d(er)/ stat des wael en(de) cleerlic te bynnen was en(de) es In welken/ thoenisse onder den ande(re)n mede openbairlic verclaert/ waert vanden ghemeynen broecke te duerne voirscr(even) gelegen/ en(de) oec vander ouder possessien en(de) gewoenten des selfs ghe/ meyns broecs die de voirs(creven) goede liede van deurne daer/ op gehadt en(de) heerbracht hadden Uut alle desen biden/ rade vander stat met goeden ripen rade voerdacht heeft/ de selve raet vand(er) stat ghet(er)mineert voer recht en(de) bescheit/ dat de voirs(creven) abdt van everbode den voirs(creven) wuwer beemt/ van sente halfmeerte tot sente mertens misse toe besloten/ en(de) bevreedt sall moghen houden het sij dat hij dien beemt/ edt oft maeyt Ende als vanden willekensdonc beemt/ dwelc
//
dat hij daer aff in possessien bliven sall Maer eest dat de goede/ liede van duerne oft de enige van hen dunct dat hen daer/ inne ongelijc ghesciet dat sij dan daer aff den voirs(creven) abdt/ voe(r) meye(r) en(de) scepen(en) van loven aen mogen spreken en(de) hij sall/ hen daer af aldaer te rechte comen want sij onder thoetvo(n)nis/ van loven geseten sijn en(de) hen beyden aldaer rechts genueght/ heeft Ende vanden beemden int ghemeyn broeck te deurne/ gelegen daer aff een deel de abdt voirscr(even) nu onlanx inne/ heeft doen slaen en(de) bevreden en(de) desgelijx oec een deel/ ande(re) goede liede inne hebben doen slaen en(de) bevreden Heeft/ de raet vand(er) stat na de waerh(eyt) en(de) conden die sij d(aer) af v(er)hoert/ hebben get(er)mineert voer recht en(de) reden(en) datmen de grechten daer/ inne gemaect slichten sall en(de) dat die open en(de) onbevreedt/ zullen bliven gelijc dat sij voertiden geweest en(de) open gelegen/ hebben Het en(de) wae(re) dat iemand anders van dien gemeynen beemde(n)/ oft van enigen van hen namaels beter bescheit bij ghebringen conste/ cor(am) lyemynghen cap(elle)[man] burgimag(ist)ris (et) pleno consilio op(pidi)/ lov(aniensis) anno xiiii[c] xxxiiii[to] mens(is) decembr(is) die prima/