Van heylwige(n) roelants en(de) woute(re)n witteman/ Item want anderwile voir meye(r) en(de) scepen(en) van loeven in recht comen sijn/ heylwijch weduwe peters wilen daneels in deen sijde en(de) wouter wit(te)[ma(n)]/ natuerlijc soen wouters witteman in dande(re) die na den rechte der stat/ van loeven comen en(de) gheerft is in seke(r) goede die wae(re)n jannes wile(n)/ daneels in dande(re) ende onder den ande(re)n de voirs(creven) heylwijch inden/ voirs(creven) gedinge dede rueren en(de) nopen testamenten en(de) huweliken/ vorwerden die sij op de voirscr(even) goede sprekende hadde ende na/ dien de scepen(en) van loeven wijsden voe(r) een vonnisse datmen den/ voirs(creven) woute(re)n vanden goeden dair o(m)me tgedinge was houden/ soude in sijnre guedinge en(de) die testamenten en(de) huweliker/ vorwairden die aldair geruert wae(re)n lieten de scepen(en) van loeven/ gaen dair de behoirde En(de) oic nu dien navolgende meynde/ de voirs(creven) heylwijch nae inhebben den gewijsden vonnisse voirs(creven)/ en(de) na den ouden hercomen vanden geliken dat sij den voirs(creven)/ woute(re)n wittema(n) bastart wael inden geesteliken rechte hadde/ mogen doen dagen gelijc de selve heylwijch dat dede doen/ en(de) mids dien de voirs(creven) heylwijch uut macht en(de) scriven van/ seke(re)n brieven die onse genedige he(r) de h(er)toge ten vervolge des/ voirs(creven) wouters gescreven heeft aen symoen vand(er) coud(er)borch he(r)/ van oplynthe(r) tot oplynthre gevangen is in contrarien den/ gewijsden vo(n)nisse der scepen(en) van loeven voirs(creven) En(de) dit ter ke(n)nissen/ der stat van loeven comen sijnde dede de selve stat den voirs(creven)/ woute(re)n wed(er) houden om dat hij der voirs(creven) heylwigen desen/ orloft afdoen soude Dair om eest dat de raet vand(er) stat van/ loeven uut vervolghe der vriende van beyde(n) p(ar)tien ten slote get(er)/ mineert heeft voir recht dat de voirs(creven) wouter alsoe vele doen soude/ / dat de voirs(creven) heylwijch uut der vroenten costeloes op hue(re)n vryen/ voete comen soude Behoudelic dien dat sij borghe setten sal/ voe(r) scepen(en) van oplynthre te rechte te comen dair dat/ behoe(re)n sal op dat hue(r) yemant aenspreken woude van des/ sij broeckechtich sijn mochte van dat sij op de vueghe als voe(r)/ te luydick gedaeght heeft in pleno consilio anno xxxvi maii ix