It(em) want joffr(ouwe) margriet deens wettige gesellinne jans radewart/ opten dach van heden den rade vand(er) stat van loeven ov(er)gegeve(n) heeft/ een supplicacie gelijc van woerde te woerde hier na volght U/ den eerve(re)n wijsen en(de) bescheidene(n) voirsienigen he(re)n burg(er)meest(ere)n scep(en)en/ en(de) rade der goeder stat van loeven thoent onderdanichlic joffrouwe margriet/ deens werdinne jans radewart hoe dat sij aenden selve(n) janne hae(re)n man vele/ erflike goede bracht heeft en(de) sijdert veel aen verstorven zijn daer op hi seke(re)/ scep(en)en brieve van loeven bekendt en(de) gemaect heeft ene(n) rombout radewart/ bastart die hem na den rechte van uw(er) goeder stat daer toe heeft doen doen/ en(de) leyden in meyninghe(n) zijnde hae(re) goede va(n) hae(re)n wege(n) gecomen daer/ mede te versette(n) en(de) te v(er)copen en(de) hae(r) en(de) hae(re) scoen kijnde(re) dier si van hem/ vier heeft also tonterven en(de) daer uut te setten en(de) v(er)theert dat voert/ met ande(re)n vrouwe(n) daer hij mede omgaet en(de) die hi dagelix hanteert/ dwelc eerve(re) he(re)n een groet ongenade en(de) ongodlic souck wae(re) en(de)/ souden daer om de vors(creven) joffr(ouwe) margriet en(de) hae(re) kijnde(re) die te grot(er)/ goede geboe(re)n sijn int leste daer om arm te werden en(de) om d(er) goeder/ lide broet gaen op dat bi uwen voirsienige(n) wijsheide(n) daer op niet/ versien en worde gelijc ghi lieve he(re)n op voerledene(n) tijde van des(er)/ saken gedaen hebt en(de) uwen secretarisen bevolen dat sij daer toe niet/ en souden doen te wae(re) yerst bi u bracht hoe wael dit daer en boven/ geschiet is mids dat verdonckert oft v(er)gheten zijn mach Bidt/ daer om eerve(re) he(re)n de vors(creven) joffr(ouwe) m(ar)griet uwen voirsienige(n) wijsheide(n)/ daer si hae(re) alre doeght en(de) godlicheiden toebetruwt dat u gelieve(n)/ wille bi uwer grot(er) goedertierenheyt daer toe te versien dat de vors(creven)/ jan radewart hae(r) man noch oec de vors(creven) rombout de goede/ van hae(re)n wege(n) gecomen met uwen brieven niet en moghen v(er)cope(n)/ noch v(er)setten gemerct dat hi goede genoech heeft van sijns selfs/ wege(n) hoe wael hi dier met roekelosen regimente veel quijt is/ worde(n) op dat de vors(creven) joffr(ouwe) en(de) hae(re) kijnde(re) daer op moghen leve(n)/ en(de) te mael niet arm noch verderflic en w(er)den daer toe si uwen/ voirsienige(n) wijsheiden ontwiveliken getruwt dat ghi niet gherne/ helpen [en] soudt oft ocsuyn wesen Dit doende seldi godlic en(de) recht/ verdichlic doen en(de) danclic gode van hemelrijc almechtich die u/ allen samentlic wille hebben in zijnre heyligher hoeden
//
Ende de(n) selve(n) raede vand(er) stat redelic dunct dat de vors(creven)/ supplicacie op redene gefundeert es Daer om eest dat de/ raet vand(er) stat get(er)mineert heeft voe(r) redene en(de) bescheyt/ datmen den vors(creven) janne radewart noch romboude radewart/ bastart mette(n) voirs(creven) beleyde noch met neghene(n) ande(re)n dat hi/ namaels maken mocht negheen goede die comen sijn van wegen/ en(de) vand(er) sijden der voirs(creven) joffrou m(ar)grieten en sal laten v(er)copen noch/ versetten voe(r) aen dier tijt dat beyde de p(ar)tijen voe(r) ogen geroepe(n)/ en(de) hae(r) bescheit opgedaen hebbende den rade vand(er) stat g de/ raet vand(er) stat get(er)mineert sal hebbe(n) wes d(aer) af geschien/ sal en(de) oft hier en boven met den vors(creven) beleyde brieve yet/ gedaen worde vanden goeden die comen zijn van weghe(n) der/ vors(creven) joffr(ouwe) m(ar)griete(n) dat dan de selve raet hae(re) goetduncken/ daer in hebben sal wed(er) dat van werden sijn sal oft en sal/ Actu(m) in pleno consilio anno xxxvii des goensdaeghs/ xxiii daghe in octobr(is)