Van woute(re)n waelgrap van sentrude(n) / Van alsulken gedinge als geweest is voe(r) meye(r) en(de) scepen(en) van loeven(en) inde banck aldaer / tusschen woute(re)n waelgrap die voe(r) meye(r) ende scepen(en) van loeven(en) gegoedt ende geerft / is in alle de goede die wae(re)n joffr(ouwe) katlinen sgreven wedewe gheerts wilen van / heusden in deen zijde ende henricken de smet die nae den rechte der stad van / loeven(en) beleidt is tot den goeden jans tays van oirdingen van sent truden in / dande(re) zijde Alse vanden goeden begrepen ind(er) cedulen h(ier) nae genoemt welc / cedule de voirs(creven) henric de smet int recht over gaf ende dede lesen ten tijde als / de voirs(creven) henric inden rechte vanden selven goeden sijn aensprake dede welc goede / voirs(creven) de voirs(creven) henric de smet meynde dat hem mids cracht van sijne(n) voirs(creven) beleide / sculdich wae(re)n te volgen mids macht van zeke(re)n geloeften van huwelek(er) vorw(er)den / die de voirs(creven) wilen gheert van heusden ende joffr(ouwe) g(er)truydt sijn moed(er) den voirs(creven) / janne taye met sijnre werdynne(n) in huwelek(en) vorw(er)den geloeft souden hebben / daer af aensprake en(de) verantw(er)den tusschen de voirs(creven) p(ar)tien gescieden ende / alst thoenisse in beiden zijden tusschen de voirs(creven) p(ar)tien geleidt waert dede / desgelijx de voirs(creven) wout(er) waelgrap inden rechte lesen een cedule die beg(re)pen / hadde zeke(re) goede die getogen wae(re)n soe hij thoonde uut den tsijsboeke en(de) leen / boeke jans he(re) van wanghe en(de) thoende oic dat de selve goede ind(er) voirs(creven) lester / cedulen begrepen wae(re)n vanden goeden ind(er) yerster cedulen begrepen (et) hevet / tvo(n)nisse der scepen(en) van loeven(en) ten uut(er)sten gewijst nae aensprake nae verantw(er)den / en(de) nae thoenisse dat de he(re)n scepen(en) van loeven(en) wijsden ende setten met hoe(re)n vo(n)nisse de / voirs(creven) p(ar)tien vanden voirs(creven) goeden ter plaetsen daer dat behoirt het sij van huwelek(en) vor / w(er)den oft van gebueren om ald(aer) tegen malcande(re)n recht te gheven en(de) te neme(n) abs(oloens) / pynnoc wijtvliet vynck lynthr(en) iunior pryke(re) sept(embris) ultima /