It(em) van alsulken stoote ende geschille als opv(er)staen es tusschen janne willemet / sone wijlen peters willemet voe(r) hem ende lijsken van vyleer sijnre nichten / die de voirs(creven) jan h(ier) inne geloeft heeft te vervaene ter eenre zijden en(de) janne / bacheleer met consente jans ha(n)nard geleydt totten goeden des selfs jans / bacheleer ter ande(re) alse van alsulken erflijken goeden bleven nae doode casins / wijlen le charlier van braeckeneygen hebben hen de selve p(ar)tien gesubmitteert / Te weten de voirs(creven) jan wilmet in janne vand(en) neufruen en(de) warnier de / postpo ende de voirs(creven) bacheleer in martine le tai(n)tenir ende woute(re)n van / haren van bruessel in alsulker vuegen dat de voirs(creven) segge(re)n alle besceit / aenhoe(re)n sullen mu(n)delinge oft met gescrifte bynnen xiiii nachten naest / comen(de) en(de) dat gedaen bynnen xiiii nachten d(aer) nae volgen(de) hoe(r) seggen vande(n) / voirs(creven) geschille voe(r) de wet van brakeneyghen uutspreken op dat zij / der saken eens zijn ende oft zij bynnen den voirs(creven) tijde niet eens en / wae(re)n so sullen zij tgescill bringen byden scepen(en) van uccle alse ov(er)man(ne) / vander saken om een seggen van rechte te hebben met ond(er)spreke oft / een vanden zegge(re)n e(n)nig(er) p(ar)tien gebrake dat zij inde dstad vandien eene(n) / gelijken ande(re)n sal moegen nemen en(de) al op cost vanden ongelijke sonder / argelist geloeven(de) de voirs(creven) p(ar)tien vast gestentich en(de) onv(er)brekelijc te / houden etc(etera) kersmake(re) lynte(re) aug(usti) xxii /