Henrick keyenoeghe jan van rotselaer / Also als na de doot jouff(rouwe) lijsbetten weduwe henrix wilen vand(er) heyden van werchte(re) / voe(r) den raide vand(er) stad in questien en(de) geschille comen zijn henrick keyenoege / die getruwet hadde de wettege docht(er) der voirs(creven) wilen gehuyschen en(de) naden / rechte der stad van loeven(en) met henricke heyns geheten van wolputte alst / blijct bijde(n) dat(en) inde middelste came(re) ond(er) meest(er) rase geregistreert geleidt / was totten goeden des voirs(creven) wilen henrix vand(er) heiden dwelc gelimiteert / stont alsoe nae de (con)dicie dair bij gescr(even) dat de voirs(creven) henrick keyenoege he(m) / met den voirs(creven) beleide der voirs(creven) jouffr(ouwe) lijsbetten leefdach lanc alse op de helcht / vanden goeden inden selve(n) beleide begrepen gheensins behulpe(n) en soude / noch hue(r) bynne(n) hue(re)n leven(en) dair met e(n)nich hynder oft letsel doen ae(n) have / oft erve der voirs(creven) jouff(rouwe) lijsbetten in deen zijde Ende dyerick va(n) langrode / en(de) goird van artsloe gehete(n) van cauwelille die naden voirs(creven) rechte na d(er) / handt geleidt zijn Te weten [vacat]/ tot den goeden have en(de) erve der voirs(creven) jouffr(ouwe) lijsbette(n) jans van rotselair en(de) / m(ar)grieten zijns wijfs docht(er) des voirs(creven) henrix keyenoeghs met den selve(n) jan(ne) / van rotselair tegewordichlijc zijnde in dande(re) om der goede wille die de / voirs(creven) jouff(rouwe) lijsbeth hue(re)n leefdach lanc heeft beseten het zijn leen chijs goede / vliegenderve oft have acht(er) hue(r) gebleven die de voirs(creven) henrick keyenoege / meynde dat hem na uutwisen van zijne(n) beleide alle half toebehoe(re)n soude(n) / Want de (con)dicie voirger(uert) hem na de doot van zijnre sweg(er) nu niet gelette(n) / en konste Oic zeide hij dat hem na dlant recht in dese goede sculdich / wae(re) een gedeel en(de) actie(n) te geboe(re)n Ende des was hij getroest tot der uut / spraken en(de) t(er)mi(n)acien vander stad bege(re)nde dat hem dair op en(de) na uutwise(n) / van dien trecht vand(er) stad geschien mochte Tot desen seide de voirs(creven) he(n)ric / dat hij mids machte van zeke(re) huwelik(er) vorw(er)den gemaect ten tijde als hij / met der docht(er) der voirs(creven) jouff(rouwe) te huwelic toegh inde voirs(creven) goede gericht / wae(re) als voirscr(even) es Dair op zijn p(ar)tien antwerden en(de) zeiden alreha(n)de / reden(en) bij welken zij hoepten datmen ter waerheit bevijnden soude dat / de voirs(creven) henric kyenoege aen tvoirscr(even) beleidt vremdelic en(de) genoech / ombehoirlic geraect wae(re) mids welk(er) vremdich(eit) zij hoopten dat hem / die and(er)s naden lantrechte inde voirs(creven) goede niet gericht en was tvoirs(creven) / beleidt ter niet te baten comen en zoude want hij d(aer)mede onterven / soude moege(n) den voirs(creven) janne van rotselair en(de) zijne(n) wive van wiens / moed(er) wegen de voirs(creven) goede quamen en(de) hue(re) kijnde(re) also hij (con)t(ra)rie der / huwelik(er) vorwerden voirs(creven) vanden goeden van zijne(n) wegen en(de) zijns
//
wijfs wegen zo verre zij hem t(er) hand comen wae(re)n hadde gedaen die hij / alle samentlic hadde vercocht en(de) hem quijtgedaen m(er) d(air)af meynde de / voirs(creven) jan van rotselair voe(r) hem en(de) zijn wijf en(de) kijnde(re) te spreken ter / plaetsen en(de) tijden hem dyenen(de) jegen de ghene die de selve goede (con)t(ra)rie / der selv(er) huweliker vorw(er)den als voirgeruert is besaten Desen poente(n) / aengesien en(de) meer ande(re)n bij desen p(ar)tien gealligeert meynden zij dat de / raid vand(er) stad hier op alsulken voirsienich(eit) soude voirtsetten dat des / voirs(creven) jans wijf van rotselair noch hue(re) wettige kinde(re) niet onterft / worden en souden Ende ten uut(er)sten na dat dese zake t(er) delibe(r)acien vand(en) / raide wael gecome(n) ende gedisputeert wairt d(aer)op genoech met consente / van p(ar)tien na ald(er) gelegenth(eit) en(de) met vollen gevolge get(er)mineert voe(r) reden / en(de) recht dat de voirs(creven) henrick keyenoege vanden leengoeden desen ae(n) / clevende soude bliven staende op zijn beloep [vande(n)] land rechte en(de) dat hij vand(en) / chijsgoeden deen helicht soude houden te zijnre tocht als een tochtene(re) / goede sculdigh wae(re) te houden(e) Bij also dat [zij] na de doot vanden selve(n) he(n)ricke(n) / op de voirs(creven) zijn docht(er) en(de) hue(re) erfgename(n) sculdich zullen zijn te come(n) / desgelijx vanden beruerliken goeden hoedanich die zijn dat die beide de / voirs(creven) p(ar)tien te gelike hebben en(de) deilen zullen en(de) dat de voirs(creven) henrick zijn / deel na zijne(n) wille sal moegen beke(re)n Ende want de voirs(creven) jan van / rotselair met der huwelik(er) vorwerden [meyndt] te volgen opde v(er)cochte goede bij / henricken vercocht So is duutsprake van dien dat de voirs(creven) jan dair / af al wairt dat hij van gemeyne(n) rechts wegen mochte niet volgen en / sal des voirs(creven) henrix leefdach lanc mair desen niet te myn sal hij zijn / wijf en(de) hue(re) erfgename(n) van dien na de doot des voirs(creven) henrix bliven en(de) / staen op hue(re) beloep van rechte cor(am) pynnoc willem(air) burgim(a)g(ist)ris et / plu(r)ib(us) aliis act(um) s(e)c(un)da oct(obris) /