It(em) claes de haen ende henrick hochts sijn behuwde soen sijn comen voe(r)/ scepen(en) van loeven(en) en(de) sijn eens wordden tgheens dat h(ier)nae volght yerst/ so heeft geloeft de voirs(creven) henrick dat hij den voirs(creven) claese houden sal sijn/ leefdaghe langc van eten drincken cleed(er) en(de) schoenne wel en(de) temelijc/ nae sijnen staet en(de) des so heeft de voirs(creven) claes over alle sijn beruerlijke/ goede zo verre hij dier mechtich es ov(er)gegeve(n) den voirs(creven) henricke om/ die ter stont taenveerden te hebben en(de) nae zijnen wille te bekee(re)n sond(er)/ des voirs(creven) claes wed(er)seggen of hem e(n)nich recht d(aer)inne te behouden/ desgelijx so heeft de voirs(creven) claes den voirs(creven) henricke gegeven ende/ bekent dat hij gegeven hadde alle alsulken erfgoede als de selve claes/ houden(de) es tot sijnd(er) tocht waer dat die gelegen sijn en(de) hoedanich die/ sijn de selve goede te houden te hebben ende te gebruycken des voirs(creven)/ claes leefdaghe lang elcx jaers opden co(m)mer d(aer) uut gaende ten behoirlike(n)/ tijde te betalen ende voirts op drie sacken rogs goets en(de) payabels d(er)/ maten van loeven(en) te weten xii moelevate der selv(er) maten voe(r) den/ sack gereekent bij also dat de voirs(creven) claes [henrick] vanden selven pachte on/ gehouden sijn sal also lange als de voirs(creven) claes by hem woent maer/ of hij van hem ghinge woenen soe sal henrick voirs(creven) hem vandiertijt/ voirts also langhe als hij elders woent betalen alle jae(r) te s(in)t andries/ misse de voirs(creven) drie sacke en(de) telken t(er)mijne alse v(er)volghde schout voirts/ so sal de voirs(creven) henrick betalen alle jae(re) van nu voirtaene also lange/ alse de voirs(creven) claes leeft alsulke ii mudde rox lijftochten als de selve/ claes zeke(re)n p(er)sonen vercocht heeft met scepen(en) brieven van loeven(en)/ maer of men de lijftocht verpanden of afleggen moetste so soude/ de voirs(creven) claes die eld(er)s wed(er) vercopen en(de) van zijne(n) weghen ver/copen borgen en(de) dan soe soude de voirs(creven) henrick den pacht d(aer)af voirt/ jaerlijx gelden ind(er) manie(re)n voirs(creven) en(de) den cost vanden brieven intversetten/ sal de selve henrick [alsda(n) oic] betalen willem(air) hazenb(er)ghe ja(nuarii) xxvi