Item also als onlangs otte van haeght die wynne geweest/ es ende nu scheydt vanden hove en(de) goeden sgoidsh(uys) van gruene(n)dale/ gelegen te mollebaix in deen zijde en(de) henrick vander sluysen die/ nu de selve goede alse wynne aengeveerdt heeft in dande(re) hen/ voe(r) scepen(en) van loven(e) verbonden hebben Alse vander schattingen/ vanden vruchten alsnu opte vors(creven) goede wezende in zeke(re) segge(re)n/ en(de) ov(er)ma(n)nen inden vors(creven) (com)p(ro)misse genoemt Soe zijn op heden/ comen voe(r) scepen(en) van loven(e) h(er)olivier vander berct prioer des vors(creven)/ goidshuis ende zegher van wynghe alse ov(er)ma(n)nen byden vors(creven)/ p(ar)tien h(ier)toe genomen Cle(re)nde ende uutsprekende in p(rese)ncien des vors(creven)/ henricx vander sluysen die dair inne consenteerde en(de) beliefde dat/ zij metten zegge(re)n dair toe gecoren en(de) bynnen den tijde d(air) toe geor/ dineert de vors(creven) vruchten wail ende deughdelic gevisenteert
//
hadden ende die getaxeert en(de) gegroetst gelijc ende in alle der manie(re)n/ die getaxeert waren doense de vors(creven) otte aenveerde ende gelijc die/ getaxeert staen inden pechtinghe brieff tuschen den vors(creven) goidshuise/ en(de) henricken voe(r) scepen(en) van loven(e) aprilis p(ri)ma lestleden gepasseert/ roelofs zande junii xxviii