[It(em)] gabriel hans ter eenre zijden ende wouter vanden kerchove ter ande(re)/ sijn comen voer scepen(en) van loeven bekennende ende verlyende dat zij/ onderlinghe ov(er)comen wa(r)en en(de) hadden malcande(re)n geconsenteert voer/ hen en(de) heure nacomelinghe alse van heurer beider huysen en(de) erven/ gelegen deen aen den ande(re)n inde pe(n)ingstrate tusschen de goede/ henricks van schoenenberghe ende den goeden toebehoiren(de) den/ witten leeuwe de erfvorwerden ende pointen hier na verclairt/ Te weten yerst dat svoirs(creven) wouters huys dwelck hij ald(aer) nuweli(n)ge/ heeft doen maken sal bliven staende also na den goeden svoirs(creven)/ gabriels alst nu steet niet wederstaende dat compt tot bynnen/ svoirs(creven) gabriels oesendruppe Ende des sal de selve wout(er) leggen/ ende erflic houden op zijnen last tusschen heurer beider huyse/ voirscr(even) een loeten goete om dwater svoirs(creven) gabriels van zijnen/ dake comende daer inne tontfaen ende voerts te leyden ter straten/ uut zonder quetse oft hynder vanden huyse oft muere svors(creven) gabriels/ It(em) dat de voirs(creven) wouter niet en sal moegen bety(m)me(re)n noch and(er)ssins/ beletten oft benemen in e(n)nigher wijs dlyecht vanden twee vynst(ere)n/ staende achter svoirs(creven) wouters nieuwe huys inden ghevel svors(creven)/ gabriels deen onder ende dander daer boven ende beide tusschen/ tvoirs(creven) nuwe huys svoirs(creven) wouters en(de) de schouwe aldair svoirs(creven)/ gabriels Welcke vorwerden ende poenten voirscr(even) de voirs(creven) p(ar)tien/ hebben geloeft deen den ande(re)n volcomelic te voldoen ende vast en(de)/ gestentich te houden tot eeuwighen daghen zonder argelist/ tymple abs(oloens) aug(usti) xi