It(em) alsoe als ten vervolghe willems van leefdale als p(ro)cur(eur) ende/ voirghenge(r) jouffr(ouwen) lijsbetten hers weduwe henricx wilen boelart/ sone wilen wouters welke henric geleyt was met scepen(en) brieve(n)/ van loeven(e) dece(m)bris p(ri)ma anno xiiii[c] xli tot allen den haefliken/ goeden henricx boelart van overhespen sone peters boelart na(tuer)lix/ voir zijn wettich gebreck soe wair die belegen zijn gescreve(n) is den/ meye(r) van ned(er)lyntre alle de selve goede des voirs(creven) henricx boelart/ onder hem gelegen de(n) dienere der stad va(n) loeven(e) inde(n) name/ vanden voirs(creven) willem(me) te leveren ende peyslijc te doen volghe(n) Ende/ oft de selve henric oft yemand anders tegen den voirs(creven) beleyde oft/ scepen(en) brieven yet allige(re)n wouden dat zij des tot eenen zeke(re)n/ dage op heden dienende alhier te rechte quamen des de selve/ henric noch nyemant van zijnen wegen gedaen en heeft den/ voirs(creven) willem(me) zijnen dach verwachtende ende recht voirt ver/ suekende doende oec bliken dexecucie van en(de) bij den voirs(creven) meye(r)/ in desen gedaen Soe hebben de scepen(en) van loeven(e) ter manisse(n)/ smeyers gewijst voir een vonnisse soe v(er)re des voirs(creven) geleydden/ wederp(ar)tie niet en quame ten opstane tsmeyers ende van hen/ datmen hem dan vanden voirs(creven) goeden houden soude in zijnen/ beleyde tot zijnre wettiger gebreken behoef soe v(er)re dat noch/ voir hen comen is Cora(m) o(mn)ib(us) scab(inis) de(m)pt(is) py(n)noc opp(endorp) aprilis vi[ta]

Hier na volgen de goede inden rechte gelesen/ en(de) dair tvoirs(creven) vo(n)nisse op geslagen is/ Inden yersten twee langhe tafelen Item eenen ronden desch It(em)/ vijf cleyne bancken een lavoir eenen hael eenen ketel een tynne(n)/ schotele een zijdele een bedde vier scrijnen drie yseren pannen/ vijf tynnen schotelen eenen tinnen pot een zijbecken een bedde/ metter coetsen noch twee bedden eenen roester een vrouwen/ hoycke eene(n) vrouwen cours eenen tynnen pot ende twee vate