Alsoe als de voirs(creven) meester peter comen is voir den rade/ vander stat en(de) overgegeven hadde een supplicacie inhoudende/ onder den anderen hoe hij xii marcii lestleden metter nacht binne(n)/ zijnen huyse dair nyemant in en was dan hij zijn huysvrouwe zijn/ maerte een geheten adriaen busin kemerling jonch(e)r anthonis va(n) rotsel(ai)r/ ende des voirs(creven) meester pet(er)s knape geheten dieric janssone va(n) oerle/ die binnen twee oft drie maenden herwerts bij hem is comen woene(n)/ verloos uut zijnre eetcameren neven zijn slaepcamere uut zijne(n) tritsoe(r)/ eenen silveren schalen twee zoutvate vanden ouden fautsoene vier/ silveren lepele ende drie ellen satijns beloepende tsamen ind(en) weerde(n)/ van tsestich cronen welke juweele metten sattijne na al dat m(eester) p(eter)/ duncken mochte mits dat hij gheen slote noch anders gebroken/ en hadde bevonden niet en mochte(n) verloren gewesen dan bij den/ ghenen vanden p(ri)vaten p(er)sonen dier maer vive en was Oec en soude(n)/ vremde p(er)sonen also niet hebben connen geweten alsoe hij seyde/ waer zijn silver ware De selve m(eester) p(eter) heeft oec bevonden bij/ zekeren des selfs diericx gescriften dat hij tanderen tiden bij de(n)/ scouth(eit) van gheldrop ende den gerichte aldair aengetast hadde/ geweest ende tweewerf opde banc geleecht sonder dat die ge/ scriften e(n)nige saken specificeerden wair om vanden welken hij/ nochtan gecomposeert heeft alsoe hij scrijft Uut welken reden(en)/ de voirs(creven) m(eester) p(eter) den voirs(creven) diericken hadde doen hachten seggende/ dat hij verstaen hadde dat in alsulken saken de prince vande(n)/ lande oft zijn dieneren met eeningen oft anders sculdich soude(n)/ zijn informacie te nemen van condicien ende famen van maerten/ ende knapen der gheenre die alsoe thue(re) verliesen het ware inden/ plaetsen dair zij voirtijts verkeert oft gewoent mochten hebben/ oft geboren waren ende vanden gerichten aldair en(de) texamineren de/ p(er)sonen dair zij verkeert hebben op hueren eedt op hen condicien/ ende famen ende op des zij dan bevinden te procederen met goeder/ insticien soe dat behoirt dwelc meester pet(er) begh(er)de D(air)op/ de voirs(creven) meester dieric met zijne(n) vrienden begh(er)den dat de/ he(re) oft p(ar)tie oft dair enige ware hem aensprake dade oft dat hij/ costeloes ontslagen worde Dair op de raet vander stad te(r) ut(er)ste(n)/ termineerde datme(n) den gevangen(en) ontslaen soude oft ticht geven/ met rechte also dat de voirs(creven) m(eester) p(eter) aldair betaelde voir des voirs(creven)/ diericx costen inde vroente gedaen veertich stuv(er)s en(de) voir tshe(re)n/ knapen eene(n) stuv(er) aprilis decima