Item vander handelinghen die anderwile geweest es voe(r) den raide vand(er)/ stad tuschen de bedesetters van velthem ter eenre ende henricken de/ hollande(re) voer hem ende alse p(ro)cureur en(de) gemechticht van henr(icken) van/ dyoen zijnen swager ter ande(r) zijden Alse van drie stucxkens erfs/ hen beiden toebehoiren(de) houden(de) omtrint een boender gelegen te velthem/ dairaff zij den vors(creven) henricken bede yesschen seggende dat hij hen/ die voermails betaelt hadde Dair op de voirs(creven) henrick de hollande(re)/ antwerde bekynnen(de) genoech die betailt te hebben mair weyg(er)de die/ voirts te betalen gemerct datmen ter wairheit bevinden soude/ tselve goet niet beter te zijne jairlicx dan een mudde corens/ erflic Dwelc dair uut ghing ende dair mede beco(m)mert was/ Niet te min hij p(rese)nteerde hen de bede te betalen vander overbaten/ datmen bevinden soude ter wairheit dat beter wa(r)e dan tvors(creven) mudde/ corens erflic Op dwelck de voirs(creven) bedesetters repliceerden seggen(de)/ dat hij tvoirs(creven) goet gebloett hadde van aff te houwen veel div(er)s/ opgaende hout ende dat hijt also geargert hadde ende dat beter/ was dan tvors(creven) mudde corens dwelc zij boden te thoenen d(air)toe/ zij op heden dach hadden voe(r) den raide vander stad dairaf/ zij heurs vermets niet en volquamen mair seiden voirt enighe/ vanden selven bedesetters dat zij hem jairlicx voer doverbate/ vanden selven erve boven tvors(creven) mudde corens gherne gheven/ wouden erflic een half mudde corens Dairop de vors(creven) henrick/ antwerde ende p(rese)nteerde dat hijt hen gheven soude voer drie halst(ere)n/ corens erfrenten ende hen dair op inde selve gronde goeden ende/ vestighen also dat hen genoech zijn soude na recht Wairt/ getermineert en(de) uutgesproken wair zij de p(rese)ntacie des voirs(creven) henr(icx)/ de hollande(re) niet aen en namen dat hij vander beden bij hen geeyscht/ en(de) van allen costen die zij d(air)om geleden hadden ongehouden zijn soude/ Cor(am) moelen burg(imagistro) vync caverson scab(inis) et aliis de consilio no(vembris) viii