Vanden gedinghe dat geweest heeft inde banck voer meye(r) ende scepen(en)/ van loeven tuschen janne knoep woenen(de) te herbenshem inde p(ro)chie/ van beckevoirt als geleidt tot allen den goeden have ende erve/ willems wilen vanden velde aenlegge(r) ter eenre ende wille(m)me/ baken verweerde(r) ter ande(r) zijden Aldair de voirs(creven) jan geleidde dede/ lesen zijn beleid vander daet xvii aprilis lestleden geschied/ voer een mudde corens lijftochten bebrieft met scepen(en) brieven van lov(en)/ die de voirs(creven) geleidde ten selven rechte overheeft Seggen(de) dat/ hem ende zijnen beleide die goede ende besunder die hij met specifi/ cacien overgaff ende na desen vo(n)nisse genoteert staen om zijn/ wettighe schult die hij bij eede p(rese)nteerde te doen verifice(re)n bijden/ ghenen dat behoirde dairaen te verhalen te voirde(r) want hij boot/ te bewisen dat die p(ar)chelen van goeden den voirs(creven) wilen willem(me)/ ende wilen zijnder huysvrouwen ten tijde als zij leefden toebehoirde(n)/ ende dat thuys ende hoff vercregen was bijden vors(creven) wilen willem(me)/ voer ende eer de selve willem heylwigen wilen cools zijn leste/ huysvrouwe getruwt hadde ende al mocht so zijn dat de selve/ wilen willem zijn leste huysvrouwe daer inne hadde doen goeden/ des hij nochtan niet en bekinde Dat soude zijn geweest ten tijde/ als de selve willem de selve zijn leste huysvrouwe getruwt hadde/ om dair uut te sluyten willems voerkint vanden yersten bedde/ Dat voirt de selve willem de leste zijn huysvrouwe overleeft/ hadde ende was also gestorven uut den vors(creven) huyse ende hove als/ uut zijnen p(ro)pe(re)n erve bij hem als vo(r)e vercregen Dat voirt de/ selve willem besat thalf boender lands als zijn p(o)per erve en(de) was/ dair uut gestorven als uut zijnen p(ro)pe(re)n erve Dat oic arnd/ vanden velde deen lijf dair de helicht vander lijfpensien opstaet/ noch livich ende leven(de) es ende dat goird vanden velde zijnen brued(er)/ dair dander helicht op stont aflivich wert des nu s(in)te mychiels/ misse lestleden vii jair was hem des gedragende tot den rechte/[Ende dat de vors(creven) willem baken en(de) zijn wijf als erfgenamen des vors(creven) wilen willems de have oic hiernae gea(n)noteert hadden g aenveerd dwelc hij boot te thoenen Hopen(de) d(air)om dat zij hem van zijnen vors(creven) gebreken vernuegen souden]/ Daer tegen de voirs(creven) willem baken verweerde(r) hem verantwerdende/ exhibeerde eenen brief onder de segelen des abds ende co(n)vents/ des ministers van s(in)t truyden van eender erf uutghevingen bij hen/ geschied der voirs(creven) heylwigen a(n)no xxxviii ende dede seggen dat/ de have ende vligen(de) erve gebleven nae de doot des vors(creven) wilen/ willems vanden velde vercocht werden op hoeghen ende dat de/ pe(n)ningen dairaf comen(de) werden bekeert in desselfs willems/ schult aen eenen geheten jan van beve(re)n anders elen van webbekem/ die die met rechte uutgewonnen hadde nae desselfs willems doot/ Ende dat de vors(creven) willem baken was een derde man die een deel/ vander selver haven cochte als een veen vreemde om zijn pe(n)ninghen
//
na duutwynnen voirs(creven) ende dat willem baken de have die/ hij nu besitten(de) es vercreghen heeft zydert der aflivicheit des/ voirs(creven) wilen willems zijns sweers ende met pijne en(de) arbeide/ ende som van zijnsn vader ende moeder zijden gecomen en(de) zom/ aengestorven zijn Dese ende meer ande(r) poenten hij p(rese)nteerde/ te thoenen hopende oft hij dat conde gedoen der aenspraken/ ongehouden te zijne Dair uuterlic beide p(ar)tien tot heuren thoene/ gewijst zijnde de voirs(creven) aenlegger luttel oft niet thoende van/ zijnen vermete dan vanden vercrige vanden huyse ende hove tassent/ gelegen ende de verweerde(r) thoende meest zijn vermeten poenten/ So verre dat scepen(en) inder saken gemaend zij gewesen hebben/ voer een vo(n)nisse dat den geleidden volgen sullen zijn wettige/ gebreken vander lijftocht dairaff dlijff noch leeft opt gelege/ met den toebehoirten so verre hij die gebreken van dier lijftocht/ verificeert bij eede Ende op dat dande(r) goede is hij verdoolt/ In scampno cor(am) om(n)ibus scabinis dec(embris) v/ Dit zijn de goede dair/ voe(r) aff geruert wert/ Ierst eenen gruenen rock gevoedert It(em) eenen gruenen coers It(em)/ vi tynnen scotelen It(em) iiii eeren potten It(em) iii bedden met heuren/ toebehoirten die int sterfhuys vercocht waren d(air)af dat alijd/ die dochter was des vors(creven) wilen willems tvie(re)ndeel vanden pe(n)ni(n)gen/ hadde It(em) huys ende hof met zijnen toebehoirten gelegen tassent/ voe(r) de kercke tuschen de goede reynkens dalen en(de) jans de raymake(re)/ uut welken huyse de vors(creven) wilen willem gestorven es It(em) omtrint/ een half boender lants gelegen boven de voirs(creven) goede tuschen de/ goede pauwels de frere in twee zijden de goede jans de raymake(re)/ en(de) de goede van zek(ere)n lombairden tantwerpen woenen(de) in dande(r)/ zijde