Allen den ghenen dien dese onse opene l(ette)ren gethoent sullen werden/ ende zunderlinghe co(m)moingmeest(ere)n scepen(en) ende raide der goed(er)/ stad van mechlen onsen lieven geminden vrienden burg(er)meest(ere)n/ scepen(en) ende raid der stad van loeven saluut met ky(n)nissen der/ wairheit doen te weten dat op heden voer ons comen es in/ p(ro)pe(re)n p(er)sone arnd de borchgreve soen wilen jans woenen(de)/ te loeven(e) inde borchstrate en(de) heeft wettelic gemechticht en(de)/ volcomen macht gegeven ende met des(en) l(ette)ren mechtich maict en(de)/ volcomen macht gheeft janne de borchgreve den jonghen/ soen jans de borchgreve brueders svors(creven) arnds Om alsulken/ actie versterffenisse ende gedeelte alse den voirs(creven) arnde/ van wille(m)me wilen de borchgreve soen wilen godevairts bleven/ ende verstorven mach zijn In een huys ende hof met zijnre/ toebehoirten gelegen te mechlen dair de selve willem ende/ wilen zijn wijff uutgestorven zijn Te aenveerden en(de) te/ vercopen en(de) tot behoef des coepers met rechte voer wet/ op te draghen over te goeden en(de) te verthijen met allen/ manie(re)n solempniteiten ende poenten van rechte d(air)toe dienen(de)/ na der stad recht van mechlen genoechdoen ende wairscap/ van zijnen weghen dairaf te geloven de pe(n)ninghe/ dairaf comende tontfanghen ende quitan(cien) dairaf te geven/ Ende voirts alle tghene (et)c(etera) Gelovende de voirs(creven) arnd vast/ gestentich en(de) ewelic van weerden te houden zo wes bijden/ vors(creven) zijnen p(ro)cur(eur) aldus gemechticht d(air)inne gedaen en(de)/ gevord(er)t sall worden Salvo iusto calculo Cor(am) moelen/ burgim(a)g(ist)ro berghe caverson scabinis januarii xii