Wij peter vander hoeven en(de) goessen tybe scepen(en) te loven(e)/ den cont eenen yegeliken dat voir ons comen zijn in p(er)sone/ arnt reers sone wilen arnts hem affirme(re)nde out zijnde over/ zijn vijfen(de)twintich jair van houdert ter eender lodewijck/ lesen en(de) katlijne [vacat] zijn wijff inden name ende/ van weghen mariens lesens huer(er) beider dochter ter andere/ zijden Opdoende [en(de) bekynnen(de)] hoe ter eren gods een houwelijc gemaect/ en(de) getracteert was tusschen den voirs(creven) arnde en(de) marien inder/ manie(re)n en(de) opde condicien hier na v(er)claert die de voirs(creven) arndt/ en(de) gehuyssche(n) [malcande(re)n] geloft hebben tachtervolgen Te weten(e) inden/ yersten dat de voirs(creven) arnt thouwelic na staet der heyligher/ kercken volbracht zijnde innebringhen [sal] alle alsulken goeden have/ en(de) erve en(de) oic vliegende erve als hem van zijnder oude/ vader en(de) oudermoeders en(de) oic van zijnen vader en(de) moeder/ bleven en(de) verstorven zijn zoe wair die gelegen zijn in huysen/ hoven wynnende lande beempden eeusen bosschen en(de) allen ande(re)n/ hue(re)n toebehoirten In welcke goede voirs(creven) de voirs(creven) marie toecomen(de)/ bruyt inden gevalle oft zij langher leefde dan de voirs(creven) arnt toe/ comende bruygoem hue(r) vry tocht hebben sal Met vorweerden/ oft de voirs(creven) arnt toecomen(de) bruygoem en(de) marie toecomen(de) bruyt/ beide aflivich wordden zonder wettighe geboirte van huer(er)/ beider live achter te laten dat dan die goede voirs(creven) succede(re)n/ en(de) toecomen zullen den naesten erfgenamen dair op die sculdich/ sullen zijn te succede(re)n naden rechte zonder dat hij arnt die in/ al oft in deele sal mogen v(er)setten vercopen nocht belasten dan met/ consente des voirs(creven) lodewijcx Heeft vort de voirs(creven) arnt openbarlic/ beghert versocht en(de) wilt mits dat hij noch niet vele en/ weet om zijn goede te reghe(re)n en(de) vele quade coepmansschape(n)/ gedaen heeft en(de) noch gescapen ware te doene dat de voirsr(even)/ lodewijck en(de) sijn wijff hem en(de) zijn goede van nu vortaen/reg thouwelic volbracht zijnde ryghe(re)n sal die hantplichten/ en(de) bloeten oft and(er)s ter pechtingen met jairscharen uutgheve(n)/ gelijc oft zijn goede waren wel en(de) getrouwelic en(de) al ten/ proffijte der voirs(creven) toecomender gehuysschen bij also dat sij den/ selven arnde hulpen zullen aen zijn creditue(re)n dat zijn schout/ die hij sculdich es sal worden betaelt behalven wes zij
//
dair inne v(er)legghen oft hen v(er)oblige(re)n [oft anderssins leenen zullen] dat zij dat aende proffijte(n)/ der selver goede zullen nemen en(de) v(er)vallen voir welken/ arbeit voirg(eruert) die de vors(creven) lodewijc en(de) zijn wijf int rege(re)n d(er)/ voirs(creven) goede doen zullen heeft [de vors(creven) arnt] metter wermmer hant tvors(creven)/ houwelic volbracht zijnde ter stont toegeseeght en(de) gelooft hen/ overtegoeden een half boender lants luttel mijn oft meer gelege(n)/ in drie stucken dair af de twee gelegen zijn beneden de thien/ schue(r) inde prochie van [vacat] en(de) tderde houden(de) lx roeden/ thuylenberghe aent ravestaetken om hue(re)n vryen wille d(air)/ met te doene sonder wederseggen des voirs(creven) arnts oft yemans/ anders Ende ter ander zijden hebben de voirs(creven) lodewijc/ en(de) sijn wijf in onderstande vanden voirs(creven) houwelike gelooft/ hue(re)r voirs(creven) dochter na hue(re)n staet temelijc uuttesetten en(de)/ te cleeden en(de) dat de selve toecomen(de) bruygoem en(de) bruyt na/ de doot des voirs(creven) lodewijcx en(de) sijns wijfs en(de) des lancxst van hen/ beiden leven(de) godelijc deylen zullen met hue(re)n ande(re)n kynde(re)n/ die na hen beiden bliven zullen in alle de goede have ende/ erve die zij achter laten zullen op dat hen gelieft bij also/ dat de selve toecomen(de) gehuyssche als dan inbringen zulle(n)/ des de vors(creven) lod(ewijc) en(de) zijn wijf met hue(re)r voirg(enoemde) dochter te/ houwelike gegeven hebben en(de) is de meyninge dat dande(re)/ kynde(re) op dat zij deylen willen van geliken doen zullen ende/ anders niet Vort is in houweliker vorwerden ondersproken wes/ goede de vors(creven) toecomende gehuyssche in houwelick v(er)crigen dat/ de lanxste leven(de) van hen beiden op dat zij gheen geborte/ van hue(re)r beiden live en hadden die zullen moegen v(er)copen oft/ versetten na sijnder gelieften sonder yemants wederseggen/ alle fraude en(de) argelist hier inne uutgescheiden Septembris/ xxiii