Alsoe als ten v(er)volghe jans van udekem na(tur)lix geleydt/ sijnde na des(er) stad recht tot allen den goeden beyde/ have en(de) erve heylwijch wilen coulon wed(uwe) jans/ wilen le bonnier jans en(de) reyneers wilen le bonnier/ huer(er) kinde(re)n te wat plaetsen die gelegen sijn gescreve(n)/ es geweest met brieven van des(er) stad den meye(r) va(n)/ duwechial oft sijnen stadhoude(r) om hem de selve goede/ te leve(re)n en(de) peysselic te doen volghen Ende oft jan/ coulon en(de) conrart sijn sone in sijne(n) broode sijnde d(air)/ tegen yet hadden willen [allege(re)n] oft hen e(n)nichs rechts totten/ voirs(creven) goeden v(er)meten oft yemant and(er)s dat sij des/ op heden come(n) wa(r)en alh(ier) inde banc voer meye(r)/ en(de) scepen(en) int recht ald(air) sij noch niemant van/ hue(re)n weghen comen en sijn den voirs(creven) geleydden/ compare(re)nde en(de) trecht voirt v(er)sueken(de) Soe hebbe(n)/ de scepen(en) van loven yerst aengehoirt pete(re)n/ comelinc bode der stad van loven (e)die cleerde bij/ sijnen eede dexecucie en(de) dachbescheydinge navolgen(de)/ den scriven(e) voirs(creven) bijden voirs(creven) meye(r) geschiet te/ sijne t(er) manessen smeyers gewijst voer een vo(n)nisse/ soe v(er)re des voirs(creven) geleydde wed(er)p(ar)tije niet en/ quame ten opstane smeyers en(de) van hen scepen(en)/ datmen hem dan vanden voirs(creven) goeden houden/ sal in sijne(n) voirs(creven) beleyde tot sijnen wettige(n) gebreke(n)/ behoef alsoe v(er)re alst noch voer hen scepen(en) come(n)/ es in scampno cor(am) om(n)ib(us) scabinis dempto roel(ants)/ octobr(is) iiii