Alsoe als ten vervolge adriaens van haenwijch als/ p(ro)cur(eur) jonch(e)r arnts van pee die met scepen(en) brieve(n)/ van loven(e) overlang gepass(eer)t heeft en(de) houden(de) es opde/ goede te huysen hove(n) landen beemden eeussele(n)/ en(de) allen zijne(n) toebehoirte(n) collarts wilen le polits van/ viler gelegen te vileer omtri(n)t ha(n)nuyt sesse mudde(n)/ corens erfpachts gescreve(n) es geweest met brieve(n)/ van des(er) stadt aen den bailly van ha(n)nuyt oft zijne(n)/ stadhoude(re) hem alle de voirs(creven) goede te leve(re)n en(de) doen/ volgen oft den bring(er) der voirs(creven) ons(er) brieve(n) in zijne(n)/ name mette(n) haefliken goeden d(air)op zijnde ende/ den p(ro)prietar(is) vanden gronde toebehoiren(de) Ende/ oft willem le polits sone des voirs(creven) wilen collarts/ tegen de voirs(creven) leveri(n)ge yet hadde willen allege(re)n/ dach van rechte alhier te co(m)pare(re)n op heden dyenen(de)/ inde banc voir meye(re) en(de) scepen(en) van loven(e) doen/ besceyden ald(air) de voirs(creven) willem noch nyema(n)t van/ zijne(n) wegen en es geco(m)pareert den voirs(creven) p(ro)cur(eur) co(m)areren(de)/ en(de) trecht voirt versueken(de) Soe hebben de scepen(en)/ van loven(e) nae dien dat hen behoirlijck gebleken es/ bij r(e)scripte des voirs(creven) bailluytz de leveri(n)ge ende/ dachbesceydinge nae inhoudt vanden voirs(creven) scriven(e)/ gedaen te zijne ter manissen smeyers gewesen voir/ een vo(n)nisse datmen den voirs(creven) p(ro)cur(eur) vanden voirs(creven)/ goeden houden soude inde macht van zijne(n) voirs(creven) scepen(en)/ brieve(n) tot zijne(n) wettige(n) gebreke behoef soe v(er)re/ alst noch voir hen scepen(en) come(n) es Cora(m) abs(oloens)/ hoeve(n) tybe thenis nove(m)br(is) xxi