Ald(aer) voir den raide vand(er) stadt comen zijn hee(re)/ en(de) meest(er) jan van cruyni(n)gen doctoir in medicine(n)/ adriaen willemss(one) bedel der faculteyt inden weer/ liken rechte en(de) met hen cornelijs vand(er) wympe(n)/ van antw(er)pen ter eenre arndt hanckart en(de) met/ hem henrick vand(er) borch ter ande(r) zijden Ald(aer) de/ voirs(creven) meest(er) jan en(de) ad(ri)aen te kynne(n) ghave(n) hoe/ dat zij voirmaels bij pete(re)n wilen vand(er) wympe(n)/ wae(re)n gecore(n) en(de) gemaict zijn executeurs en(de)/ testamenteurs en(de) dat de selve peter acht(er) hem/ liet zijne huysvr(ouwe) en(de) eene docht(er) eene jonghe/ weese Acht(er)volgen(de) den welken zij soe langhe/ de selve huysvr(ouw) bleef sitten(de) in hue(re)n wed(uw)[en]/ stoele dbeste hadden gedaen ten vordele ende/ p(ro)ffijte der selver jong(er) weesen en(de) dat d(aer)nae/ de selve huysvr(ouw) te huwelike getogen was met/ eene(n) geheeten cornelijs vand(er) moelen d(aer)mede/ zij was gaen woene(n) tantw(er)pen en(de) met huer/ gevuert hadde de voirs(creven) hue(r) docht(er) daer de/ selve moed(er) aflivich wordden was En(de) dat/ alsdoen de selve stadt van antw(er)pen daer/ tsterfhuys vand(er) moed(er) gelegen was geordin(er)t/ en(de) gestelt hadde den voirs(creven) cornelijse die oom/ was vand(en) voirs(creven) kinde en(de) gielijse wynricx/ als mo(m)boi(r)en vand(en) voirs(creven) kinde om tselve/ kint en(de) hue(r) goede te rege(re)n en(de) ten meeste(n)/ p(ro)ffijte der selv(er) te bringen(e) Naevolgen(de)/ den welken de selve mo(m)boirs v(er)cocht hadde(n)/ seke(r) erfgoede gelegen te bincke(m) die zee(r)/ v(er)re van antw(er)pen den kinde als zij seyden/ ongerieflijc wae(re)n gelege(n) ende als zij/ / d(aer)af guedinge souden doen hadden zij gebeden den/ voirs(creven) meeste(re)n janne en(de) ad(ri)ane d(aer)bij te comen(e) ende/ met hen de guedinge te doen(e) gemerct dat zij noch/ van hue(re)r execucien niet en wae(re)n geabsolveert oft/ ontslagen Dwelc de voirs(creven) executeurs deden ten v(er)sueke/ der selv(er) mo(m)boi(r)en en(de) op gelofte die zij hen deden/ d(aer)af to(n)theffen(e) en(de) inne te staen(e) tege(n) eene(n) yege/ liken met wille weten(e) ende bijzijne en(de) ov(er)staen(e)/ henr(ix) hanckaert brueders des voirs(creven) arnts die als/ secretar(is) de selve guedinge voir meye(r) en(de) scepen(en)/ van loven(e) passeerde Nochtan dat hij naemaels/ en(de) noch dagelijcx pretendeert selve mette(n) selve(n)/ arnde de naiste te zijne vand(en) selve(n) kinde en(de) hue(re)n/ goeden en(de) dat he(m) de mo(m)borie vand(er) moeder zijden/ toebehoi(r)en soude niet tegenstaen(de) dat ten tijde/ vand(er) selv(er) guedinge(n) de voirs(creven) mo(m)boe(re)n en(de) executeurs/ hen p(rese)nteerden soe v(er)re so zij de voirs(creven) goede hadde(n)/ willen behouden dat zij hen de selve goede soude(n)/ hebben gelaten voir den selve(n) prijs dat die v(er)cocht/ wae(re)n Soe v(er)stonde(n) de voirs(creven) executeurs die zed(er)t/ der aflivich(eit) der voirs(creven) moed(er) hen der saken luttel/ oft niet vele en hadden onderwonden vele div(er)se/ questien aengaen(de) den goeden en(de) mo(m)borien desselfs/ wae(re)n opv(er)staen d(aer)aen zij hen luttel oft niet/ vele en stieten mair wae(re)n d(aer)af div(er)se brieve(n)/ tusschen dese stadt en(de) der stadt van antw(er)pen/ gescreve(n) ond(er) de welke ond(er) den ande(re)n in eene(n)/ brieve die van des(er) stadt wegen gesonde(n) was/ aen de stadt van antw(er)pen gescreve(n) was dat de/ stiefvade(r) alle tgereede wel drie duyse(n)t r(insch) guld(en)/ oft meer weert zijnde bij slappich(eit) en(de) quad(er)/ diligen(cie) vand(en) executeurs doen zijnde en(de) doir/ de ving(er) siende d(aer)inne en(de) in ande(re)n saken den/ / kinde cleyn besorch gedaen moege(n) hebben Welke/ woirde grootelijc gedroegen ten acht(er)deele en(de) afne/ mi(n)gen vand(er) ee(re)n der voirs(creven) executeurs die als/ zij hoepte(n) alhier noch nerge(re)ns dair zij bek(in)t/ wae(re)n d(aer) voi(r)e niet vernae(m)t en wae(re)n Beg(er)den/ d(aer)om en(de) v(er)sochten dat de p(ar)tijen te weten(e) de/ voirs(creven) arndt en(de) henrick zijn brued(er) die dat/ te kynne(n) gegeve(n) mochten hebben souden goet/ doen de voirs(creven) woirde over hen geseet oft in/ alsoe v(er)re zij die niet goetgedoen en conste(n)/ dat de stadt hen d(aer)af dade alsulken eerliken/ r(e)p(ar)acie en(de) correctie als nae gelegenth(eit) der saken/ behoirde oft dat de selve stadt des in gheene(n)/ ondancke en name en(de) liet hen hue(r) recht volge(n)/ ter plaetsen dair zij meynden te rechte te behoi(r)en/ Ende de voirs(creven) cornelijs gaf te kynne(n) dat hij/ tande(re)n tijden voir den tijde vand(er) discencien alh(ier)/ was gerasteert ten v(er)sueke der voirs(creven) gebruede(re)n/ en(de) dat meer was hadden de selve gebruede(re)n/ doen v(er)bieden den ghenen die den kinde van/ erfrinten en(de) huyshue(re)n sculdich zijn dat zij die/ nyeman(de) gheven en souden tott(er) tijt toe beslicht/ wae(r) wie van hen mo(m)boe(re)n blive(n) soude(n) D(aer)uut/ den kinde groot acht(er)deel gescape(n) wae(r) te comen(e)/ wa(n)t die rinte(n) wel van twee jai(r)en ond(er) de/ luede wae(re)n o(n)betailt bleve(n) v(er)socht d(aer)om dat/ de voirs(creven) gebruede(re)n hem ae(n)sprake dade(n) oft dat/ zijten ontsloege(n) En(de) vand(er) rinten die o(n)betailt/ wae(re)n bleven beg(er)de hij dat de voirs(creven) executeurs/ gemerct dat zij noyt van hue(re)r execucie(n) en/ wae(re)n o(n)tslagen en(de) bijd(er) stadt van antw(er)pe(n)/ tot hem en(de) zijne(n) medegeselle wae(re)n gevuecht/ om de voirs(creven) goede te hulpe(n) rege(re)n hen behulp/ daden dat de voirs(creven) rinte(n) wordden inne ge/ haven en(de) ten p(ro)ffijte vand(en) kinde geleeght/ / wa(n)t hij van gheene(n) synne en was he(m) des voirde(r)/ te ond(er)wynden voir dier tijt hij tegen de voirs(creven)/ gebrueders wae(r) beslicht D(aer)tege(n) de voirs(creven) arndt/ hanckart dede seggen yerst aengaen(de) den injurie(n)/ dat hij ind(er) wairh(eit) van dien luttel oft niet/ en wist te spreken(e) wa(n)t henric(us) zijn brued(er)/ die sake meest beleydt hadde en(de) de brieve(n)/ verworve(n) beg(er)de d(aer)om en(de) v(er)socht wa(n)t te henr(icke)/ alsoe een yegelijc weten mochte mits der sterften/ en(de) haestig(er) siecten alsoe gestelt was dat hen/ niet gelege(n) en was te co(m)pare(re)n oft ond(er) de/ liede te wandele(n) dat hem eene(n) ande(re)n dach/ gegeve(n) wordde om zijne(n) brued(er) bijd(er) hant te/ bringen(e) en(de) alsdan te antw(er)den Met meer/ woirden bij p(ar)tijen in wed(er)zijde(n) gealleg(er)t es/ bijden raide vand(er) stadt geordin(er)t get(er)mineert en(de)/ uuutgesproken dat den dach van rechte bij p(ar)tijen/ in wed(er)zijde soude wordden gecontinueert tot/ van ghiste(re)n over een mae(n)t bynne(n) den welke(n)/ de voirs(creven) henrick gestelt soude moege(n) zijn bijd(er)/ gracien goids te compare(re)n om he(m) alsda(n) te/ v(er)antweerden(e) en(de) datme(n) p(ar)tien alsdan aengaen(de)/ der bet(er)nissen vand(er) injurien en(de) oic aengaen(de) der/ mo(m)borien alsdan recht doen sal alsoemen nae/ gelegenth(eit) der saken bevi(n)den sal behoiren(de) En(de)/ aengaen(de) den rinte(n) hie(re)nbynne(n) v(er)schene(n) dat/ cornelijs van zijne(n) wegen als mo(m)boir mette(n)/ voirs(creven) executeurs op dat zij he(m) bijsta(n)t in dien/ doen willen sal moegen constitue(re)n om de/ selve rinten inne te halen(e) en(de) to(n)tfange(n) be/ halven dat die sullen wordden gestelt ond(er) wet/ oft aengeleet oft bekeert inde sculde(n) desselfs/ kints tot hue(re)n meeste(n) p(ro)ffijte totter tijt de/ sake uut(er)lijc sal zijn beslicht in (con)s(ili)[o] opidi/ januarii xvi