Cond sij allen lieden dat arnt tritsman van meld(er)t es comen in jeghenwordicheiden/ der scepen(en) van lovene en(de) heeft ghenome(n) en(de) bekent dat hij ghenome(n) heeft/ van h(ere)n coenrade vand(er) balct proefst des cloest(er)s sinte gheertruden te lovene des voers(creven)/ cloest(er)s goede gheleghen te bebbenheem met husen hoven winnende(n) lande(n) beemden euselen/ en(de) allen haren toebehoerte(n) te houden te hebben en(de) te winnen enen [t(er)mijn] van ses nu naest toecomende en(de) sond(er) middel volghende elcs jaers daer en binne(n) o(m)me sessentwintech mudde/ hards corens goet en(de) payabel meld(er)ts pacht [ghelijc opde voers(creven) lande wassen sal wel bereydt met wa(n)ne en(de) met vloghele] en(de) love(n)sch(er) maten altoes tsinte andriesmisse te/ betalen en(de) tot lovene binne(n) den voers(creven) cloeste(r) te leve(re)n tot elken t(er)mine alse vervolghde scout/ Item sal de voers(creven) arnt al elcs jaers leve(re)n driehond(er)t walme(re)n de [voers(creven)] husinghe mede te deckene/ en(de) als men die aldaer verdect dan sal de voers(creven) proeft de dachhuren betalen en(de) arnt voers(creven)/ de werclieden voeden [Oec es vorw(er)de gheviele ane de voers(creven) husinghe yet meer te decken of te ty(m)me(re)n daer af soude de voers(creven) proefst oec de dachhuren en(de) ande(re)n cost ghelden en(de) betalen mar de voers(creven) arnt soude den werclieden den montkost doen] Item selen de voers(creven) p(ro)efst en(de) arnt elc van hen beiden elcs jaers copen/ dertech mandelen stroes o(m)me tvoers(creven) lant daer mede te mesten Oec [Item] es vorw(er)de dat [dat] arnt voers(creven)/ binne(n) den voers(creven) ses jaren alle de voers(creven) lande [sal] ov(er)mesten en(de) [die lande altoes] wel en(de) loflec wynnen ghelijc sinen/ reenghenoten en(de) ten eynde vande(n) voers(creven) ses jaren laten alsoe als hijse vant te sinen aencomen/ Dats te wetene den wynt(er) art besayt op vier voren en(de) den zomer art op twee voren en(de)/ de brake op ene vore voert sal de selve art de voers(creven) lande beemde en(de) eusele wel bevreedt/ laten en(de) de beken gheveeght ghelijc mense hem nu levert Welke poente(n) vorw(er)den en(de) condicie(n)/ voers(creven) de voers(creven) arnt tritsman heeft gheloeft wel en(de) volcomelec te voldoene in ald(er) voeghen/ en(de) manieren voers(creven) en(de) tot elken t(er)mine alse vervolghde scout En(de) o(m)me de meerd(er) sekerheit hier/ af soe heeft de voers(creven) arnt tris tritsman gheloeft den voers(creven) proefst te settene tot ene(n) rechte(n)/ onderpande alse voer de vorw(er)den voers(creven) de goede hier nae ghenoemt en(de) alsoe vele daer toe te/ doene [ter mae(n)nessen des voers(creven) proefsts] voe(r) he(re) en(de) hof daer die goede af rueren dat den voers(creven) proefst [den voers(creven) t(er)mijn durende] vast en(de) seker sal sijn/ Inden iersten derdalf dachmael lands gheleghe(n) ane onderoede aert int(er) bona d(omi)ni walt(er)i de/quaderibbe milit(e) (et) bo[(na)] p(re)sc(ri)pti mo(na)sterii s(an)c(t)e g(er)trud(is) lov(aniensis) tusschen de goede her wout(er)s vand(er) quader/ brugghe(n) ridd(er)s en(de) scloest(er)s va(n) sinte gheerde(re)n voers(creven) Ite(m) een dachmael lants gheleghen ane den/ hornoc biden cro(m)men putte Ite(m) een dachmael lants gheleghe(n) ten eyghen tusschen de goede wout(er)s/ py(n)noc en(de) jans van oppeem Item een dachm(ael) beemds gheheten den cro(m)men beemt En(de) alle dese/poe vorwerden poente(n) [en(de)] condicien [voers(creven)] hebben gheloeft te samen met den voers(creven) arnde tritsman onghe/[sund(er)t en(de) onghescheiden] jan wout(er) weyn en(de) arnt sine kinde(re) [sone] te voren uut des voers(creven) arnts haers vaders brode ghedaen/ in alle der voeghen voers(creven) alse vervolghde scout Hier waren over jan de witte en(de) wout(er) zas/ scepen(en) van lovene ghegheven int jaer onss he(re)n m cccc drie tweentwintech daghe in meye