Tvonnisse tusscen janne vand(er) stoct [cled(er)make(re)] die geleit es totte(n) goeden/ willems druytmans sijnre kind(ere)n en(de) henrix aerts in deen zijde en(de)/ janne de roeve(re) [van langdorp] in dande(re) alse van (½) boend(er) erfs luttel min oft/ meer gelegen ten erdborne int fen tussce(n) lijsbetthe(n) loekens goede/ wae(re)n ende de goede jans bouwens en(de) neve(n) de strate ald(aer) Dwelc/ stuc erfs de vors(creven) jan vand(er) stoct meynde dat hem en(de) sine(n) beleide volge(n)/ soude Gemerct dat dat henricke(n) arnts vors(creven) toebehoert hadde en(de)/ acht(er) hem bleve(n) wae(re) dair af de voirs(creven) jan de roeve(re) de cont(ra)rie meynde/ seggen(de) dat henric arnts vors(creven) in tijde(n) vorleeden te wete(n) inde(n) jare/ van xxxix come(n) wae(re) voir scepen(en) va(n) arschot en(de) hem ald(aer) ontgoet/ hadde vanden vorg(eruerde) stuc erfs en hadde d(aer) inne gegoet ten erflike(n)/ rechte ja(n)ne bouwens janne giels en(de) ja(n)ne de roeve(re) vorscr(even)/ met vuegen dat de selve jan opdat hij scadeachtich worde van/ alsulke(n) i(½) mudde(n) rox lijftochte(n) staen(de) ten lijve lijsbetthe(n) dignen/ naturleke docht(er) jans bloems hem selve(n) ontheffen soude
//
en(de) sijne scade v(er)hale(n) aen tvors(creven) erve Seggen(de) oec mede dat dit op/ dragen en(de) ontgoede(n) geschiet was lange voir den dat(en) vanden/ beleide des vors(creven) jans vand(er) stoct Seggen(de) voert dat hij vanden vorg(eruerde)/ i(½) mudde rox scadeachtich hadde geweest en(de) met strangheid(en) va(n) rechte/ heeft moeten bet(alen) gelijc hij dat poent met scepen(en) van arschot/ boet te thoenen ende and(er) vorg(eruerde) poente(n) boet te thoene(n) met alsulk(er)/ wairh(eit) d(aer) mede hij mette(n) mynste(n) lide(n) mochte inde(n) rechte ende/ hem tot sine(n) thonisse gewesen sijnde Ten dage van thoene(n) thoende/ hij de ierste poenten met scepen(en) brieve(n) van arschot Thoende/ oec voert mette(n) selve(n) brieve(n) dat sij oud(er) wae(re)n van dat(en) dan dbeleit/ des vors(creven) jans Thoende voert met scepen(en) van arschot gelijc hij/ hem v(er)mete(n) hadde Es gewijst met desen woerde(n) dat de vors(creven) jan/ vand(er) stoct met sine(n) vors(creven) beleide aen tvors(creven) stuc erfs v(er)doelt es/ Cor(am) om(n)ib(us) scab(inis) dempt(o) abs(oloens) vide(licet) pynnoc rijke witte ov(er)winge/ vynck(enbosch) lint(re) fe(bruarii) xx