Cond zij allen lieden dat jan van assche de jonghe sone jans/ van assche wonen(de) te houthev(er)le in p(rese)nc(ia) d(er) scepen(en) van loven(en) gestaen/ heeft genome(n) en(de) bekent dat hij genome(n) heeft van gielise van/ vynck(enbosch) tymm(er)man een wijnhof geheete(n) thof toeverbroeck des selfs/ gielijs met gaders allen den wynnen(de) landen totte(n) selven hove/ behoeren(de) geleg(en) inde prochie van houthev(er)le en(de) noch met/ eene(n) bogardeken acht(er) tvoirs(creven) hof geleg(en) Te houden en(de) te/ hebben van halff meerte naestcomen(de) eene(n) t(er)mijn van ix/ jare(n) lang dueren(de) deen nae dand(er) stappans sond(er) middel/ volgen(de) elx jaers dae(re)n bynne(n) o(m)me en(de) vore de helcht/ vanden vruchten jairlijx opde voirs(creven) goede en(de) boegart/ wassen(de) Item es vorwerde dat de voirs(creven) wynne de/ voirs(creven) lande den voirs(creven) sijne(n) t(er)mijn duerende wael en(de)/ loffelijc wynne(n) werve(n) en(de) overmesten sal gelijc sijne(n)/ regenoete(n) bove(n) ende beneden It(em) es vorwerde dat de voirs(creven)/ wynne de voirs(creven) lande ten eynde van sijne(n) t(er)mijne/ sal laten te weten(e) vi boend(er) besaeyt met rogghe op/ vier voren en(de) drie boend(er) op een vore o(m)me gedaen en(de)/ niet besaeyt It(em) es vorwerde dat de voirs(creven) wynne op/ sijne(n) cost jairlijx des voirs(creven) gielijs helcht der vorchten
//
hem toebehoren(de) levere(n) sal te loven(en) It(em) sal de voirs(creven) wynne jairlijx/ den voirs(creven) gielise moete(n) scudden xx mandelen walms o(m)me de voirs(creven)/ huysinghe mede te v(er)decken(e) Welke huyse de voirs(creven) gielijs den voirs(creven)/ wynne levere(n) sal in goeden state tusschen dit en(de) half meerte/ voirs(creven) en(de) die sal de voirs(creven) wynne van dan voertane den voirs(creven)/ sijne(n) t(er)mijn dueren(de) houde(n) op sijne(n) cost vand(er) ond(er)ster rijkelen ned(er)wert/ en(de) in goeden state En(de) oft soe waere datme(n) aen de voirs(creven) huysinghe/ yet wercte decte oft plecte van outs d(aer) aff sal de voirs(creven) wynne/ den werclude(n) den montcost gheve(n) en(de) gielijs sal de dachuere(n) betalen/ uutgenome(n) van nuwen werke d(aer) aff de voirs(creven) wynne negheensijns/ van montcoste noch and(er)s gehoude(n) en sal sijn It(em) sal de voirs(creven) wynne/ op sijne(n) cost gehouden sijn den voirs(creven) gielise jairlijx den voirs(creven)/ t(er)mijn dueren(de) te vueden en(de) te houden(e) ii verkene van half m(er)the/ tot oeghste toe gelijc den sijne(n) It(em) sal de vors(creven) wynne de(n) vors(creven) gielise/ jarlijx gehoude(n) sijn te saye(n) i halst(er) lijssaets sond(er) de(n) selve(n) wynne d(aer)/ inne gerecht te sijne d(aer) aff de vors(creven) gielijs den saet leve(re)n sal/ en(de) de wynne moet d(aer) toe dlant gereide(n) en(de) desgelijx mach/ de selve wynne voir hom selve(n) oec desgelijx een halst(er) lijsaets/ saeye(n) sond(er) den selve(n) gielijse d(aer) inne gericht te sijne It(em) voirt/ sal de vors(creven) wynne den vors(creven) gielijse jairlijx gehoude(n) sijn sijn/ staken te halen d(aer) de vors(creven) gielijs die cope(n) sal en(de) die vue(re)n/ opden wijng(ar)t des selfs gielijs en(de) desgelijx de oude stake(n) die/ vande(n) wijng(ar)de des vors(creven) gielijs come(n) sulle(n) den selve(n) gielijse/ tot sijne(n) huyse te loven(en) leve(re)n sond(er) cost des selfs gielijs Ende/ desgelijx jarlix verware(n) ii hoeydaghe die uute(n) vors(creven) goede(n)/ gaen alsoe dat den vors(creven) gielijse d(aer) aff egeen scade en geschiede/ En(de) alle dese vurwerde(n) (et)c(etera) cor(am) wijtfliet voshem ja(nuarii) xxii/