It(em) want stoet en(de) tebat opv(er)stae(n) en(de) v(er)rese(n) wae(re)n tussce(n) ja(n)ne/ uuter helcht den jonge(n) sone jans in deen zijde en(de)/ mychiele claes [en(de) gielijs uut(er) helcht] in dande(re) Alse van zeke(re)n handedich(eiden) die/ sij deen totte(n) and(ere)n gedaen hebbe(n) Soe hebbe(n) hen de/ vors(creven) p(ar)tije(n) vande(n) vors(creven) stote en(de) van al des d(aer) aen cleve(n)/ gesubmitteert en(de) verbonde(n) in segge(re)n en(de) vrientlic yffene(re)n/ Te wete(n) de vors(creven) jan uut(er) helcht in arnde en(de) vande(n)/ dale en(de) in jorijse vanden berghe en(de) de vors(creven) mychiel/ en(de) gielijs in goerde rabode gehete(n) luyx en(de) in wout(ere)n/ den becke(re) hoemake(r) op alsulke(n) vuege dat de vors(creven)
//
segge(ren) van elk(er) p(ar)tije(n) besceide aengehoert [geinformeert] sijnde huer segge(n)/ d(aer) af eendrechtichlic uutsegge(n) en(de) p(ro)nu(n)cie(re)n sulle(n) tussce(n) dit/ en(de) maendach naestcomen(de) mett(er) sonne(n) op dat sijs en(de) van accorde/ sijn En(de) op dat sijs niet eens en sijn so sulle(n) sij neme(n) eene(n)/ ov(er)ma(n) den welke(n) sij vand(er) vors(creven) sake(n) informe(re)n sulle(n) der welke/ ov(er)ma(n) d(aer) af geinformeert sijnde sijn uutsprake d(aer) af doen en(de)/ uutspreke(n) sall bynne(n) viii dage(n) d(aer) nae p(ro)mitt(entes) rat(um)/ abs(oloens) prijke(re) dec(embris) xvii