Item want stoet en(de) tebat opv(er)staen ende verresen sijn tusschen janne/ cruyers in deen zijde ende goerde tollers in dande(re) alse van allen [alrehande] zaken/ stucken eysscinghen van goeden en(de) aenspraken die de voirscr(even) jan cruyers/ ende goerd deen totten ande(re)n uutstaende moeghen hebben tot opden dach/ van heden Soe eest dat beyde de voirscr(even) p(ar)tijen comen sijn voir scepen(en)/ van loeven(en) ende hebben hen vanden voirscr(even) stoete en(de) van des daer aen/ cleven mach zamentlijc gekeert gesubmitteert en(de) verbonden in jacoppen/ uuten lyeminghen in alsulker vueghen dat beyde de voirscr(even) p(ar)tijen hue(re)n/ eyssch ende aensprake deen den ande(re)n ov(er)geven sullen tusschen dit en(de) paesschen/ naestcomen(de) Op welken eyssch en(de) aensprake de voirscr(even) p(ar)tijen huer verant/ werden ende alligacien met allen hoe(re)n bescheyde weder om deen den ande(re)n/ ov(er)geven sullen bynnen viii daghen daer nae Dat gedaen de voirscr(even) jacop/ van elker p(ar)tijen bescheyde metten thonisse aengehoirt op dat sij e(n)nich behoeven/ volcomelijc geinformeert sijnde sijn segghen en(de) uutsprake daer aff segghen en(de)/ p(ro)nu(n)cieren sall bynnen xiiii daghen daer nae Geloven(de) de voirscr(even) jan/ cruyers en(de) berthelmeeus geraerds die nae den rechte der stad van loeven(en)/ comen en(de) geleyt es tot allen den goeden have ende erve des selfs jans/ cruyers in deen zijde ende de voirscr(even) goerd in dande(re) malcande(re)n vast/ gestentich en(de) omverbrekelijck te houden en(de) te voldoene soe wes bijden/ voirscr(even) jacoppe van tghene dat voirscr(even) steet geseedt en(de) uutgesproken/ sall wordden in e(n)nig(er) manie(re)n cor(am) ov(er)wynghe lynthr(e) aprilis quarta/