Het sijn comen in rechte voir meye(r) en(de) scepen(en) van loeven(en) henry de/ waelhain naturlec als geleit totte(n) goede(n) boudaerds wile(n) buffet in/ deen zijde ende jacop motton die getroudt hadde jeha(n)ne(n) buffet/ nu aflivich sijnde docht(er) des vorg(enoemde) wile(n) boudaerds en(de) m(ar)griete(n) des/ selfs boudaerds wijve alse vander have(n) h(ier) nae bescr(even) Inden/ Iersten ii bedden mette(n) hoetpoluwe(n) iii saerdgen iiii paer slapelakene/ It(em) ix oercussene tott elke(n) ii tieke(n) behoeren(de) It(em) ix cussene It(em)/ v witte ee(re)n ketele(n) It(em) i swerte(n) ketel It(em) i gare(n) ketel It(em)/ i ee(re)n becke(n) It(em) iiii ee(re)n panne(n) It(em) i yseren panne It(em) iiii mottele(n)/ potte(n) It(em) i lavoer met ii toetels It(em) i oescruyke It(em) ii ee(re)n/ kendeleers met eenre pipen It(em) i ee(re)n kendelee(re) met ii pipen/ It(em) iiii te(n)ne(n) q(ua)rt potte(n) It(em) i tenne(n) geltstoep It(em) i derdele pot/ va(n) tenne It(em) xv te(n)ne(n) platte scotele(n) en(de) iii diepe te(n)ne(n) scotele(n)/ It(em) vi te(n)ne(n) dobbelieren ii tennen soutvaten It(em) iii platteele te(n)ne(n)/ en(de) iii tennen homborge potten It(em) iii vrouwen rocke gevoed(er)t/ met pelterien i roc gevoedert met wullen It(em) noch i ydele(n)/ rock It(em) v coerse It(em) ii vrouwen hoyken i vrouwen crappruyn/ i paer laken mouwen It(em) i pels It(em) x hymmen [hoedoeken] It(em) iiii a(m)me/ laken ii lange dweelen en(de) ii clein dweelen It(em) vi goede/ vrouwe(n) hymmen It(em) xii coepe(re)n lepele coepe(re)n lepele i vrouwe(n)/ riem mette(n) toebeh(oerten) It(em) noch alrehande cleine haeflike goede de(n)/ huysraede toebehoerende It(em) iii scrijne(n) iii coffers It(em) in silver en(de)/ in goude xx g(ri)pen Van welk(er) vors(creven) haven hier voertijden zekere/ gedingen geweest hadden tusscen den vors(creven) p(ar)tien so v(er)re dat/ de selve have den vors(creven) henry de waelhain met vo(n)nissen/ aengewesen was te volgene en(de) hoewale den selve(n) henricke/ de selve have d(aer) nae uut versueke der stat van loeven(en) ov(er)ge/ levert was so en was hem nochta(n) alsdoen niet ov(er)gelevert de/ vors(creven) xx g(ri)pen noch oec ii scrijnen en(de) eenen tennen pot i v(er)sueken(de)/ d(aer) o(m)me de selve henric in sinen beleide en(de) gewijsde(n) vo(n)nissen/ d(aer) af gehouden te worden Naeden welken de vors(creven) jacop motton/ dede opdoen dat hij de vors(creven) xx g(ri)pen niet ontfange(n) en hadde/ noch dat oec sijn wed(er)p(ar)tie dat niet gethoenen en soude
//
connen dat sij hem gelevert hadden geweest en(de) want die xx g(ri)pe(n)/ hem in huwelik(er) vurw(er)d(en) mett(er) vors(creven) haven bij m(ar)grieten weduwe/ wilen boudaerds vors(creven) geloeft en(de) bevurwert wae(re)n Soe meynde/ hij al hadde hij die ontfangen ongehoude(n) te sijne van dien wed(er)/ om te restitue(re)n p(re)senteren(de) nochta(n) sinen eed dat hij die xx g(ri)pe(n)/ niet ontfangen en hadde Seggen(de) voert dat al eest soe dat/ de vors(creven) have den vors(creven) henry aengewesen is te volgene/ so es nochta(n) dat gesciet behoudelike(n) den ov(er)gevene dat/ de selve henric alsda(n) ov(er)gaff te weten die have den selve(n)/ jacoppe op goede caucie te late(n) volgene gelijc hij hem/ des gedroech totte(n) vo(n)nisse(n) die d(aer) af gescr(even) en(de) geregistreert/ wae(re)n ende so hadde de selve jacop gep(re)senteert goede/ caucie d(aer) af te settene hoe wale dat h tot noch toe niet/ en heeft moegen geboe(re)n en(de) p(re)senteerde alnoch te settene/ goede caucie en(de) borchtochte voe(r) de vors(creven) have goetgenoech/ sijnde t(er) discrecie(n) vander wet van gemblours d(aer) ond(er) de vors(creven)/ have berustende es ende de selve have nu geta behoerlic/ getaxeert te wordene om de weerde der selv(er) haven oft sij/ bij hem in sinen levene gemi(n)dert oft geargert worde dat/ opgericht te wordene nae de doot van hem den voirscr(even)/ henricke(n) va(n) waelhain En(de) op dese p(rese)ntacie meynde hij/ dat hem sculdich wae(re) wed(er) om gerestitueert te worden o(m)me/ dier sijn leefdage te gebruyke(n) opde caucie vors(creven) d(aer) af de/ vors(creven) henric seggen dede want de selve jacop de xx/ g(ri)pen ontfangen hadde dwelc hij gelijc hij dat boet te/ thoenen so meynde hij dat hem die gerestitueert souden w(er)de(n)/ voe(r) alle vo(n)nissen Soe es ten uut(er)sten de(n) p(ar)tien gewijst/ nae aensp(ra)ke v(er)antwerde(n) en(de) thoenisse van beide(n) p(ar)tien dat/ so wa(n)neer de vors(creven) jacop sijn p(rese)ntacie voldaen sal hebben dat/ alsdan de vors(creven) henry gehoude(n) sal sijn hem de vors(creven) have wed(er)/ om te restitue(re)n cor(am) roelants jasp(ar) abs(oloens) vync lint(re) meersb(er)ge/ junii xv/