It(em) brued(er) jan va(n) gheele prioer des goidshuys va(n) betanie(n) va(n) sinte/ marien te croys alleyns va(n) wege(n) des selfs goidshuys heeft/ oppenbarlic geconsenteert en(de) willecoert dat alsulke(n) beleit/ brief d(aer) mede lodewijk mathijs vors(creven) beleit is nae d(er) stat recht/ va(n) loeven(e) totte(n) goeden have en(de) erve albrechs wile(n) de pundre/ sal blive(n) liggende onder scepen(en) van loeven(e) tot behoef des selfs/ lodewijx tot sulk(er) meyni(n)gen oft den selve(n) lodewijke in toecomen(de)/ tijden gebuerde enighe prami(n)ge scade oft last te hebben(e) vande(n)/ vors(creven) iiii peet(er)s lijfpens(ien) ten live roelfi roelofs vors(creven) en(de) sijnd(er) huys/ vrouwen het wa(re) inde jaerlike betalinghe bewisenisse oft/ aflegge(n) der selv(er) dat hem da(n) de vors(creven) lodewijc behulpe(n) sal opde/ goede des vors(creven) wijlen aelbrechs alsoe wale opde ghene d(er) / tvors(creven) goidshuys inne gegoet sal worden als op dande(re) diet selve/ goidshuys va(n) wege(n) des selfs wile(n) aelbrechs heeft o(m)me d(aer) af/ scadeloes en(de) costeloes onthaven te worden want de vors(creven) pe(n)ni(n)ge(n)/ bide(n) vors(creven) brued(er) ja(n)ne tot behoef des vors(creven) goidshuys opgebuert/ en(de) ontfange(n) sijn soe hij dat gekent heeft en(de) dat de/ brieve(n) vander guedinghe(n) ond(er) scep(enen) blive(n) sulle(n) liggen(de) o(m)me/

d(aer) tot behoef lodewijx vors(creven) tott(er) tijt toe hij ontslage(n) sal worde(n)/ vander borchtochten vors(creven) tot die(n) eynde dat de selve erfbrieve/ den vors(creven) lod(ewijk) en(de) sinen beleide negeen hind(er) noch p(re)judijs doen noch/ sijn en sullen aentgene dat vors(creven) steet in enig(er) manie(re)n Toeseggen(de)/ en(de) geloeven(de) voert de vors(creven) lodewijk den vors(creven) and(ere)n drie p(er)sone(n)/ en(de) elken besundert mette(n) selve(n) beleide so wa(n)neer sijs behoeve(n)/ en(de) va(n) node sulle(n) sijn t(er) manisse(n) va(n) hen oft des eens va(n)/ hen alle behulp va(n) rechte te doene opde goede vors(creven) des/ vors(creven) wilen aelbrechs o(m)me hen vand(er) vors(creven) borchtochte(n) op/ dat sijs beghe(re)n costeloes en(de) scadeloes tontheffen(e) en(de) tontlasten en(de)/ niet vorde(r) en(de) dat also v(er)re alst in hem sal sijn en(de) de/ goede strecken sullen En(de) ten eynde va(n) desen datme(n) dan de/ vors(creven) erfbr(ieve) den vors(creven) cloeste(r) sal laten volgen cor(am) eisd(em)