It(em) cont sij allen lieden [dat symoen] massijs van he(re)nthout in jegewordich(eit) der scepen(en)/ van loeven(en) ghestaen heeft ghenome(n) ende bekent dat hij ghenome(n) heeft van/ roelove roelofs wonen(de) te loeven(en) dwinhoff desselfs roeloffs gheheeten thoff/ tuydekem metten landen en(de) mett(er) weyden dair toebehoren(de) ende den ande(re)n/ sine(n) toebehoirten gheleghe(n) inde p(ro)chie van herent achter tcloest(er) van / bethleem uutghescheyden de goede h(ier) nae besc(re)ven inden yersten ii stucke(n)/ lants deen aen dande(r) ghelege(n) houden(de) te same(n) iii dachmale gelege(n)/ achter tcloester toest(er)hem die peet(er) vand(er) dilen in pechtingen/ hult [vacat]/It(em) noch een stuck lants d(aer) neven ghelegen aen dande(r) zijde vander strate(n)/ ende noch een boend(er) lants dat goort vander eect [haert] hult ghelege(n) achter/ den roesselberch in welke ghespecificeerde goede de voirs(creven) wynne egheen recht/ hebben en sal te houden te hebben ende te wynnen(e) van halff meerte/ naistcomen(de) eenen t(er)mijn van xii jairen langk due(re)nde deen nae dande(r)/ zond(er) myddel volgende elcx jairs dae(re)n bynnen te weten(e) tvoirs(creven) hoff metten/ landen o(m)me de helicht van alle(n) de(n) vruchten jairlix opde selve goede wassende/ by alsoe dat de voirs(creven) wynne des voirs(creven) roelofs helicht vanden vruchte(n) voirs(creven) / af doen sal ende inden bandt leve(re)n ende desselfs roelofs helicht ov(er) ande(re)n/ hoep yerst inne vue(re)n sond(er) cost des voirs(creven) roelofs ende de voirs(creven) wynne sall/ den cnape des voirscr(even) roelofs ald(aer) comen(de) om tcoren opt velt te deylen den/ montcost geven It(em) de wynne sall den dersschers vueden die des voirs(creven) / roelofs ghedeelte dersschen sulle(n) ende dair voe(r) hebben caff ende crinsen/ oft voe(r) de crinsen elcx daighs voe(r) ii dersschers een molevat rox dwelck/ den voirs(creven) roelove best ghelieft ende roeloff sal de dachhue(re)n betale(n) ende/ de voirs(creven) weyde behoudelijken dat hij int elsbossche eegheen schade en/ doe elcx jairs dae(re)n bynnen voe(r) en(de) o(m)me xx rinsche gulden(en) elken/ rinsche(n) gulden(en) gerekent voe(r) xx stuv(er)s alle jaire tsinte mertenssmisse/ inden wynt(er) te betalen(e) den voirs(creven) roelove den voirs(creven) t(er)mijn due(re)nde en(de)/ telken t(er)mijne alse vervolghde schout It(em) de voirs(creven) wynne sall tfroyt/ op sine(n) cost ter eerden leve(re)n ende des voirs(creven) roelofs helicht van sine(n)/ grayne ende oefte jairlix te loeven(en) leve(re)n It(em) sal de voirs(creven) roelof behoude(n)/ int voirg(enoemde) hoff de poorte en(de) tsteynen huys met sine(n) toebehoirten/ en(de) den coren solde(r) die hij ald(aer) heeft doen maken tsijne(n) p(ro)fijte en(de) gerieve/ en(de) noch thoefken d(aer) den wijng(ar)t op stoent zond(er) den wynne dair inne/ ghericht te zijne welck hoefken sall de wynne wynne(n) werve(n) mesten
//
ende besayen ghelijck den ande(re)n goeden voirs(creven) ende dens(er) vruchten dair op/ wassende afdoen en(de) die den voirs(creven) roelove oic te loeven(en) leve(re)n ten coste desselfs/ wynne(n) ende h(ier) voe(r) sall de wynne hebben tot sine(n) verdoene den boegaert/ ghelegen acht(er) den ovenboer uutghescheiden tfroit dwelck de voirs(creven) roelof/ en(de) wynne halff ende halff hebben zullen ende noch den wermoes hoff gelege(n)/ tussche(n) thuys ende den ove(n)boer die de selve wynne oic alleene tot sinen/ verdoene hebben sall It(em) sall de wynne hebben alle(n) verdroeghde willighe(n)/ behoudelick dat hij voir elke verdroeghde willighe wed(er) om sette(n) sall ii/ leevende pooten ende die verware(n) ende wassende houden It(em) tot dyen sall/ de selve wynne opt selve goet [jaerlix] planten dairt best dyent vijftich poote(n)/ halff willighe(n) ende halff alboeme(n) ende die verwaren en(de) wassende/ houden It(em) de wynne sal moge(n) truncken hegghen en(de) haghen en(de) tru(n)ceyke(n)/ te behoirlijken tijde tsijnre berringhe(n) behoeff dair hem roeloff dat bewijsen/ sall t(er) minst(er) schaden It(em) inde willighe(n) en sall de wynne egheen/ recht hebben dan te trunckene totten setten vanden poten en(de) bevreden/ vanden goeden It(em) sall de voirs(creven) wynne [jairlix den voirs(creven) t(er)mi(ne) due(re)nde] tgeheel stroe vanden goede(n) jairlix/ comen(de) int tselve hoff slijten en(de) te meste maken ende dat opt dlant/ vue(re)n zond(er) te vercoepen(e) It(em) sal de voirs(creven) wynne jairlix den voirs(creven) / roelove leve(re)n jairlix hond(er)t bosselen walms int hoff te verdecken(e) ten coste/ en(de) laste des voirs(creven) wynnen It(em) de wynne sall de huyse houden vander/ und(er)ster rijkelen ned(er)weert op sine(n) cost It(em) alle alsulke(n) schade(n) die/ aen de huysinghe gheschiede(n) by swynne(n) ocsuyne oft bij sine(n) beesten/ sal de selve wynne richten It(em) oft de voirs(creven) wynne eenich mest/ buyte(n) coept opt dlant te vue(re)n dair aff sal roeloff betale(n) de twee deele(n)/ en(de) de wynne dand(er) derdendeel ende de wynne sal dat halen en(de) saelt/ vue(re)n opde voirs(creven) v lande [alsoe wale opde verste als opde naeste] It(em) zullen de voirs(creven) roelof ende wynne(n) bynne(n)/ den yerste(n) drie jaire(re)n alle jare coepe(n) c mandelen walms [stroes] die de/ voirs(creven) roelof en(de) de wynne te gelijke betalen zulle(n) ende de wynne sall/ die op sine(n) cost halen en(de) dat sal de wynne met sine(n) beeste(n) ette(n) ende/ slijten bynne(n) den hove en(de) dair af mest maken en(de) dat wed(er) om vue(re)n/ opde selve lande tot hue(re)n meeste(n) p(ro)fijte [gelijck voirs(creven) steet] behoudelick oft de voirg(enoemde)/ roelof den voirs(creven) wynne de voirs(creven) pechtinghe op seyde bynne(n) de(n) yerste(n)/ drie jairen dat dan de selve wynne int leste jair vande(n) drye(n) ongehoude(n)/ sijn sall buyten mest oft stroe te betalen(e) It(em) oft men int voirs(creven) /
//
hof van nuws dect oft plect dair af sal roeloff den last draghen/ behoudelick dat de wynne die ghereetscap hale(n) sal daert behoeft It(em) / de wynne sall de lande wynne(n) meste(n) ende bezayen wel ende lofflick/ met ghetideghen voren ghelijck reghenoete(n) ende besaeyt laten en(de) bedrive(n)/ alsoe hijt vynden sall sond(er) hoer vruchte(n) ten ware met roelofs (con)sente/ It(em) de wynne sal den voirs(creven) roelove jairlix [geve(n) en(de)] leve(re)n iiii mandele(n)/ stroes It(em) de wynne sal den voirs(creven) roelove jairlix doen tot loeven(en) iiii/ caerweyde(n) met sine(n) wagen(en) ende p(er)den ende dan sal roelof den wynne/ teten gheven en(de) den p(er)den It(em) roelof sal moge(n) scheyde(n) talle(n) drie/ jaire(n) op dat hem ghelieft bij alsoe dat hijt den wynne een jair te voe(re)n/ seggen sall It(em) de wynne en sal negheen lande vande(n) voirs(creven) goeden/ voirt moge(n) uutgeve(n) noch ande(re) lyede [goede] wynnen sond(er) roelofs (con)sent It(em) / de wynne sall int hoff late(n) alsoe vele mest als hij dair vynden sal ende/ de voirs(creven) goede tot sine(n) afscheyden bevreedt en(de) begrecht late(n) alsoe hij/ die bevinden sall tot sine(n) aencoemen(en) It(em) de wynne sal jairlix [die] de beken/ grechte(n) wat(er)leyden en(de) strate(n) vage(n) ende maken aen die goede liggen(de)/ alsoe dat roelof dair af egheen schade en hebbe It(em) sal de selve wynne/ jairlix mergelen ii boender lants ende roelof sal dyen betalen opde/ cuyle ende de wynne saelt halen ende alle dese vurw(er)den (con)dicien gelufte(n) etc(etera)/ cor(am) lyminghen colonia decemb(ris) tercia