Vander aenspraken die laureys van wynghe ghedaen heeft tot lodewijke(n)/ uuter helicht van zeker handedich(eit) ende quetssue(re)n die de voirs(creven) lodewijck/ den voirs(creven) laureyse ghedaen en(de) ghegeve(n) soude hebben ond(er) weghe(n) sint joes/ dair sij bedev(ar)t toghen des gheleden sijn mach omtrent vi jair deylende/ dair af den eedt te gheven(e) oft te nemen(e) hopen(de) soe wair de voirs(creven) lod(ewijck)/ dair af egheene onschout en doet dat hij den voirs(creven) laureyse dair af/ bet(er)nisse doen sal het sij met eene(n) weghe te meylane(n) oft tsint thewouts/ ten elsete(n) oft met sulker bet(er)nissen als de hee(re)n scepen(en) dair af wijsen/ zullen en(de) den meest(er) vander quetssu(er)en voir af Dair op de voirs(creven) lod(ewijck)/ hem verantw(er)de seggen(de) dat hij nae hem noyt en sloech noch en stack/ noch handedich aen hem en was in gra(m)me(n) moede noch hem oic gequetst/ en hadde soe verre hij wist p(rese)nterende de selve lodewijck dair af sinen/ eedt te doene hopen(de) de selve lod(ewijck) wair hij den eedt doet soe hij gep(rese)nteert
//
heeft dat hij d(air) mede ghestaen zoude m(air) p(rese)nteerde den meest(er) af te doene/ Es ghewijst wair de selve lod(ewijck) sine(n) eedt doet soe hij gep(rese)nteert heeft/ dat hij metten voldoene van sijnd(er) p(rese)ntacie(n) gestaen sal cor(am) lyeminge(n) roel(ofs)/ pynnock cok(eroul) april(is) s(ecund)[a]