Allen den ghenen die dese l(ette)ren sullen sien oft hoe(re)n lesen burg(ermeesteren)/ scepen(en) ende raid der stad van loven(e) saluyt met kennissen der wairh(eit)/ doen te weten dat opden dach van heden voir ons come(n) es in p(ro)pren/ p(er)sone lijsbeth vanden scrieke wed(uwe) henricx wijlen schore wonen(de) terpse/ ende heeft gheconstitueert ghesedt ende volcome(n) macht ghegheve(n)/ h(ere)n janne van aerschot prieste(r) wonen(de) terpse alle huer goede chijsen/ renten erfpachte(n) lijfrenten jairgulde(n) ende schulde(n) te holsbeke/ te wesemale te corttenb(er)ghe tev(er)sb(er)ghe terpse ende elswair bynne(n) den/ lande van brabant gheleghen Te rege(re)n te mane(n) teysschen optebue(re)n/ en(de) tontfanghen aen wat p(er)soene(n) of goede(n) oft te wat steden oft plaetsse(n)
//
dat dat sijn mach dair vore te panden te dagen(e) te beleyden(e)/ en(de) rastamen(te) te doen leggen(e) nae ghewoente ende costume vand(er)/ plaetssen dair dat behoren sal oft behoeve(n) soude moghen Ende/ op dats noot ghebuerde voir alle richte(re)n gheestelick en(de) weerlick/ met rechte te vervolgen(e) te v(er)antw(er)den(e) te beschudden(e) en(de) in aenlegg(er)s/ of verw(eer)ders stat te bedingen(e) die te wynnen(e) ende te v(er)liesen(e) thonisse/ ende wairheid(en) te leyden(e) ende vand(er) weder p(ar)tijen te sien leyden(e) jegen/ hue(re)n p(er)soenen ende hue(re)n ghetuygenissen te excipieren(e) [en(de) te] opponeren(e)/ composicie ende mynlijke yffeninghe dair aff te maken(e) den schuld(eren)/ van des hij ontfanghen sal quijt te schilde(n) ende quijtan(cie) te gheven/ ende de omberuerlijke goede der voirs(creven) lijsbette(n) eene(n) t(er)mijn van vi/ jairen uut te gheve(n) te verpachte(n) ende te v(er)hue(re)n Ende voortaen/ g(e)n(er)alick en(de) sp(eci)alick allet ghene dair inne te doene en(de) te vorde(re)ne/ dat de selve lijsbeth selve soude mogen doen waert dat sij tegew(or)dich/ ende voir oeghen ware Gheloven(de) de vors(creven) lijsbeth bij hue(re)n trouwe(n)/ in stad van eede ende opt verbont van allen hue(re)n goede(n) beruerlick/ en(de) omberuerlick tegew(or)dige en(de) toecomen(de) tot ewige(n) dagen goet/ vast gestentich van weerde(n) en(de) onv(er)brekelick te houde(n) en(de) te hebben(e)/ allet gene des bijde(n) vors(creven) h(er) janne h(ier) inne gedaen en(de) gevord(er)t/ sal wesen alle argelist h(ier) inne uutgescheyde(n) due(re)nde dese/ voirs(creven) p(ro)curacie en(de) mechtich(eit) totten wederroepe der vors(creven) lijsbette(n)/ cor(am) willem(air) burg(imagistro) naus(nijdere) scab(ino) scab(ino) maii xvi