It(em) woute(r) van loevene wonen(de) bij sinte g(er)truyden lijne(n) weve(r) heeft ghelooft/ in handen vrancks willem(air) als burg(ermeester) h(ere)n enghelbrechte van hamele/ prieste(r) ende walt(e)r(us) nijs van lu(m)mele aut alt(er)i xi gulden(en) te x st(uvers) den/ gul(den) gerekent ende iiii(½) st(uvers) alse van carp(er)s die de voirs(creven) woute(r) teghen/ den voirg(enoemde) walter(us) ghehadt heeft Te weten(e) x(½) stuv(er)s dair aff des/ sondaghs voir ald(er)heyligen dach naestc(omende) ende alsdan voirt aen alle/ weken des sondaghs deen nae dande(r) dair nae zonder myddel volghen(de)/ eene(n) braspe(n)ningk dair aff te betalen(e) tott(er) wijlen toe dat de vors(creven)/ xi gul(denen) en(de) viere en(de) (½) stuv(er) geheelick ende al betaelt zulle(n) sijn/ Met condicie(n) bij alsoe de voirs(creven) woute(r) e(n)nighe vanden voirs(creven) t(er)mijnen/ een maent ov(er) liet gaen zond(er) betalen dat in dien ghevalle de gheheele/ su(m)me gheheel v(er)schene(n) sal sijn ende heeft in dien gevalle de selve wout(er)/ van lov(ene) ov(er)ghegeve(n) hem tot sine(n) huys oft elswair dair sijn goede te bevinde(n)/ zulle(n) sijn voir tghebreck alsdan te laten pande(n) en(de) die pande te laten/ v(er)coepen zond(er) voirder recht dair aff te v(er)sueken(e) Ende h(ier) op heeft/ de voirs(creven) walter(us) ghekent ontfanghen te hebben(e) xii stuv(er)s oct(obris) xiiii