It(em) t(er) meerd(er) vestich(eyt) den voirs(creven) janne boxhoe(re)n den vad(er) en(de) den vors(creven)/ janne boxhoe(re)n den jonghe(n) zijne(n) zone van des voirs(creven) es te doene/ soe sijn bij handen mercx crauwels vorst(er)s te loven(e) vanden voirs(creven)/ janne carpentier den voirs(creven) janne boxhoe(re)n den vader tot behoef van/ hem selve(n) ende tot behoef jans sijns zoen voirs(creven) in handen gesedt/ en(de) voir tvoldoen der voirscr(even) lijftochte(n) verobligeert de juweelen/ h(ier) nae besc(re)ven Inden yersten sesse zilve(re)n scalen de boerde v(er)gult/ wegen(de) derthien m(ar)ct drie oncen It(em) noch sesse zilve(re)n scale(n) weg(ende)/ sesse m(ar)ct sesse oncen It(em) achtiene zilve(re) lepele wegen(de) twee m(ar)ct/ viere en(de) halve once(n) It(em) twee zilve(re) scalen op voeten inde(n) bode(m)/ van elken vanden selve(n) twee scalen staend(de) dbeelde van ons(er) liev(er) vrouwe(n)/ It(em) noch een zilve(re) scale inden bodem vand(er) selv(er) scalen staen(de) een sterre/ eene(n) tresijnap en(de) een scale ghebobbeleert wegen(de) de selve viere scale(n)/ metten tresijnappe te gade(r) vijff m(ar)ct sesse oncen It(em) een vrouwe(n)/ zilve(re)n vergult gorddel op ledere ghewracht zond(er) ghespe en(de) zonder/ m(er)chant met dertiene zilve(re) vergulden(e) naghelen d(aer)toebehorende/ It(em) een zilve(re)n v(er)gulden ghespe metten m(er)chante wegen(de) tselve gorddel/ metten leedere mette(n) derthiene naghelen en(de) mett(er) gespen en(de) m(er)chante/ te gade(r) twee en(de) een halff m(ar)ct It(em) twee vrouwen onder goirddele met/ ketene(n) en(de) met cleyne(n) stucken van ghebroken(e) zilve(r) wegen(de) te gade(r)/ metten webben twee m(ar)ct It(em) twee zilve(re) vergul(de) ryeme met roode
//
webben ende eene(n) zilve(re)n vergulden(en) ryem met eene(n) blauwen/ webbe wegen(de) de selve drie ryeme sesse oncen It(em) een vrouwe(n)/ voerspensel met drie gulden spanne(n) met drie hondekens dair/ bynnen en(de) met thiene beeren ghewracht van p(er)len It(em) noch een/ cleyn voirspensel met drie gulden spanne(n) met p(er)len saphieren/ en(de) garnaten inde spande staen(de) met eene(n) bu(r)deken p(er)len in een/ lijnen doexken ghewonnen weghende de selve spensele met hue(re)n/ toebehoirten voirs(creven) ende metten bu(r)deken p(er)len te gade(r) een marct/ acht oncen ende vijfthiene inghelsche ghepresen te gade(r) op/ viertich rinssche gulden(en) It(em) eene(n) gul(den) rinck met eene(n) amerauwe/ eene(n) gul(den) rinck met eene(n) robbijne eene(n) gul(den) rinck met eene(n)/ saphie(r) ende acht ande(re) gul(den) ringhe gheamelgeert weghende/ de selve ringhe te gade(r) een once ende vierthiene inghelsche/ ghepresen op twintich rinssche gulden(e) It(em) een gulden ketene/ met eene(n) spanne drie kant met twee p(er)len schots met eenen/ saphie(r) ende met eene(n) robbijnken(en) Noch een gul(den) span met eend(er)/ joffrouwen ghestoffeert met p(er)len ende met eene(n) saphiere op hair/ buxken Een gulden(e) collie(r) met eene(n) robbijne ende met eend(er)/ p(er)len hangen(de) in een loof een cleyn gulden span met drie p(er)lekens/ ende eene(n) saphierkene wegen(de) te gade(r) twee oncen xii ynghelsche/ ghepresen op twintich rinssche gulden(e) Ende al des voirscr(even) es/ troys ghewichte Tot dien eynde ghebuerd(er)t den voirs(creven) janne/ boxhoe(re)n de(n) vader en(de) janne zijne(n) zone ind(er) betalinghen der voirg(eruerde)/ lijfrente(n) oft bewijsenisse der selv(er) e(n)nich ghebreck te hebben(e) soe sulle(n)/ sij aut alt(eri) oft yemant and(er)s recht inde selve lijfpen(sie) hebben(de) sijn/ ghebreck aen de vors(creven) iuweele(n) moghen v(er)halen met alle coste ende/ co(m)me(r) ende die ten prijse van juweliers oft goutsmede(n) bynne(n) der/ stad van loven(e) hen des bestaen(de) met rechte moghen v(er)coepe(n) zond(er)/ den voirg(enoemde) janne carpentier d(aer) af vorde(r) te derven v(er)antw(er)de(n) En(de) oft/ dair yet overschote dat soude hij den voirs(creven) janne carpentier wed(er)kee(re)n/ en(de) oft d(aer) yet ghebrake dat soude hij mette(n) vors(creven) scepen(en) brieve moge(n)/ v(er)halen Behoudelijken dat hij sal moghen p(ro)cede(re)n met e(n)nighe(n) van/ beyden dwelck hem best ghelieve(n) sal ende oft de voirs(creven) jan ende/ sijn zone oft yemant and(er)s recht d(aer) inne hebben(de) and(er)s dan met v(er)coepen(e)/ der voirg(eruerde) zuweele(n) vernueght wordde(n) soe sal de voirscr(even) jan boxhore(n)/ de vader ghehoude(n) sijn den voirs(creven) janne carpentier de voirs(creven) juweele(n)/ ov(er) te gheven(e) ghelijck hij die ontfanghen heeft dwelck de voirs(creven)
//
jan boxhoren den voirg(enoemde) janne carpentier aldus toegheseegt en(de)/ ghelooft heeft te doene Met vurwerden in al des voirs(reven) bij consente/ ende ov(er)gheven(e) des voirs(creven) jans carpentier bevurw(er)t ende [clairlic] ondersproken/ oft de voirs(creven) juweelen den voirs(creven) janne boxhoren ghestolen wordden/ oft verbrant dat de selve jan boxhoe(re)n aen den voirs(creven) ja(n)ne carpe(n)tir/ ghestaen sal dair vore te betalen(e) te weten(e) altoes voir twee marct/ vanden zilve(re) voirscr(even) vijftiene rinsche gulden(en) ende dande(r) juweele(n)/ ten prijse voirs(creven) zond(er) arghelist cor(am) eisd(em)