Het sijn comen in rechte voir meye(r) ende scepen(en) van loven(e) hubrecht en(de)/ barth(olomeus) sruysschen ghebruede(re) ende andries van roesmeer als momboir/ m(ar)grieten sijns wijfs zust(er) der selv(er) ghebruede(re) in deen zijde en(de) weyn/ stercke in dande(r) ald(aer) de voirs(creven) kinde(re) sruyssche(n) den voirs(creven) weyne aensp(ra)ke(n)/ van dat hij ten tijde als hij rintmeest(er) was she(re)n van bouth(er)shem metten/ selve(n) hee(r) van bouth(er)shem ende somwijlen bij hem selve(n) ind(er) h(er)berghen/ van sinte anthonijs die ja(n)nes wijlen die ruyssche huer(er) liede vad(er)/ ophielt vertheert hadde ende schuldich bleve(n) was xxv rinssche gul(den)/ bove(n) alle betalinghe ende dat hadde oic huer(er) liede moeder ten ynde/ van hue(re)n leven(en) voir den p(ro)chiaen alsoe v(er)claert Men bevonde oic zeke(r)/ ghescriften van rekeninghen mett(er) hant van weyne voirs(creven) gheteekent/ soe es ten uut(er)sten nae v(er)antw(er)den dat weyn dair op ghedaen heeft/ de selve weyn vander aenspraken met vonnissen onghehouden ghewesen/ cor(am) g(odefrido) roelofs roelofs meld(er)t berthe(m) vos most m(ar)tii xxi