It(em) al eest alsoe dat de voirs(creven) barth(elmeeus) inde voirs(creven) goede ghegoeyt es gelijc/ voirs(creven) es soe es nochtans vurw(er)de ende ondersproken want de selve goede/ met meer ande(re)n goede(n) als ghelege(n) ande(re)n p(er)soene(n) toebehoren(de) noch niet/ verteghen en sijn hoe wale sij nochtan [die] tusschen hen mynlick ghedeylt hebbe(n)/ oft soe ghebuerde dat dair inne in toecomen(de) tijden questie ghebuerde en(de)/ de goede des voirs(creven) barthelmeeus hem elswair vyelen dan voirs(creven) steet dat/ de selve barthelmeeus dair mede te vreden ende (con)tent sal moeten wesen/ eeve(n)verre hij in deen helicht ende tghene vanden gheheelen goeden gedeylt/ wordt Uutghenome(n) in een cleyn huysken dat nu lodewijck baets besetten(de)/ es dair inne de selve barthelmeeus niet ghedeylt sijn en sal ende tghene/ des hem in die stat elswair vallen sal ghedragen(de) inder maten alsoe vele/ goede als ghedraghen de voirs(creven) goede dair inne de voirs(creven) gorde barthel(meeus)/ ghegoet es aenverden sal opden co(m)mer voirs(creven) jairlix dair uut te betalen zond(er)/ fraude ende arghelist Es voirt mede vurweerde alse van alsulken seven(en)/ pont payments die nae der guedinghe(n) des voirs(creven) hughens bevonden sijn/ uutgaen(de) uut den voirs(creven) goeden des voirs(creven) barthel(meeus) ende uut den ande(re)n/ goeden div(er)se p(er)soene(n) toebehoren(de) ald(aer) gheleghen die de heiligeest van/ si(n)te machiels dair aen heeft dat de voirs(creven) barthelmeeus deen/ vierendeel dair af mette(n) ande(re)n chijse(n) d(aer) uutgaen(de) uute(n) selve(n) sine(n) goeden/ tot sijnre last jairlix draghen ghelden ende betalen sal niet wederstaen(de)/ dien dat die inden waranderscape der selv(er) goede(n) ten tijden als de voirs(creven)/ huege die vercreegh niet beg(re)pen noch ghecleert en staen op welke vurw(er)de(n)/ voirs(creven) de voirs(creven) barthel(meeus) de voirs(creven) guedinghe aenveerdt heeft cor(am) eisd(em)