Allen den ghene(n) dien dese l(ette)ren ghetoent zullen wordde(n) burg(er)meeste(re)n/ scepen(en) ende raid der stad van loven(e) saluyt met kennissen der wairh(eit)/ want godlick es der wairheit ghetuyge te gheven(e) in allen rechtv(er)dighe(n)/ ende ghewairghen zaken besundert alsmen dair toe versocht es soe/ eest dat wij ten v(er)sueke jans van eycke wettich zone henricx van eycke/ pelletiers certifice(re)n voir die gherechte wairheit dat opden dach/ van heden come(n) en(de) p(er)soneelijken v(er)schene(n) sijn in onsen raide de eerbe(re)/ p(er)soene(n) h(ier) nae ghenoempt ingeseten poirte(re)n van des(er) stad wettich van/ bedde ende weerdich van gheloeve dair af de jonxste out was lvi[tich]/ jair ende dair bove(n) Te weten(e) andries de nausnide(re) jan stercke frissen/ van zellair smet arnt vanden zavelpoele jan vander biest molde(r) ende/ willem pauwels Draghen(de) ende tuyghen(de) eendrechtichlijken bij hue(re)n/ eede(n) die sij dair o(m)me bij stavi(n)ghen jans die coninck vorste(r) en(de) diene(r)/ onss(er) ghened(ichs) she(re)n tsh(er)toghen in sijnre stad van loven(e) lijflijken ten heyligen/ deden dat hen wel kenlick es ende wel voir steet dat sij ghekint hebbe(n)/ eene(n) gheheeten mathijs van eycke pelsmake(r) doen hij leefde die woenechtich/ was in sinte qui(n)tens strate te loven(e) ende dat de selve mathijs sitten(de) in/ wettighen huwelijken met sijnre huysvrouwen hadde eene wettighe gebuerte/gheheeten henric vander selv(er) sijnre huysvrouwen gheheeten henrick die/ insgelijcx dambacht vanden pelsmake(re)n hanteerde Ende dat de selve/ mathijs in vollen stoele sitten(de) ende sijn voirs(creven) huysvrouwe leven(de) gecreech/ ende ghewan aen eene blinde vrouwe eene(n) bastaert zone gheheete(n) tijsken/ die was ghemeynlijck gheheeten tijsken die blinde om dat hij sijnre moeder/ die blindt was plach te leyden(e) Te dyen eynde dat hem eenyeghelijck/ dien dat aengae(n) mach te voirde(r) moghe weten te vueghen(e) en(de) des/ torcond(en) (et)c(etera) cor(am) roelants burg(imagistr)[o] et alsoloens lynden scab(inis) aug(usti) ix