Het sijn comen in rechte voir meye(r) en(de) scepen(en) van loven(e) inde/ banck aldair henrick del haye van jandrein in deen zijde en(de)/ lodewijck uut(er) helicht en(de) meest(er) jan calab(er) secretar(is) der stad van loven(e)/ in dand(er) zijde aldair de voirs(creven) henrick aensprack den voirs(creven) lodewijke/ en(de) meest(er) janne als van dat tusschen hen in voirleden(en) tijden gedaen/ en(de) gheschiet wae(re) een v(er)coepen van twee en(de) eene(n) halve(n) sacken core(n)s/ der maten van thiene(n) erfs pachts die de voirs(creven) henrick seyde hebben(de)/ op zeke(re) goede te jandrein ghelegen den voirs(creven) lodewijke en(de) meest(er) ja(n)ne/ toebehoren(de) versueken(de) dat den selve(n) lodewijke ende meest(er) ja(n)ne dat/ sij de guedinghe vanden voirs(creven) pachte ontfinghen en(de) hem voldoen/ van sijne(n) pe(n)ningen Dair op de voirs(creven) lodewijck en(de) meest(er) jan deden/ antw(or)den kennende de voirs(creven) comescap gheschiet te zijne niet simplic/ alsoe henrick del haye voir hem nempt mair met zeke(re)n (con)dicie(n) beg(re)pe(n)/ in eenre cedullen die ten tijden vander comescape(n) bij consente van beyde/ p(ar)tijen voirs(creven) gemaect en(de) gescreve(n) w(er)t tot goider memorien ende oick/ gheteekent met hanteken(en) ph(ilip)s en(de) willems van dyoen ghebruede(re)n die/ als vriende ende maghen henricx voirs(creven) d(air) bij en(de) ov(er) wae(re)n dair de/ vurw(er)den vanden voirs(creven) comescape(n) nae inhoudt der voirs(creven) cedullen/ vercedelt wae(re)n bij accorde ende consente van beyden p(ar)tijen Bieden(de) dat/ te thoene(n) eve(n)v(er)re henrick hen dat ontkinne(n) woude ende nae dien/ dat henrick del haye dat ontkinde soe hebben de voirs(creven) lodewijck/ en(de) meest(er) jan tot hue(re)n thonisse ghewesen sijnde ghethoent met henric/ vanden speelhove ende met philippe en(de) willem(me) van dyoen voirs(creven) dat/ de voirs(creven) comescap ghedaen was ende ghesloten opde condicie(n) beg(re)pen/ ind(er) cedulle(n) voirs(creven) die alh(ier) in rechte gheexhibeert was d(air) af de/ tenue(r) h(ier) nae volght Dit sijn de pointe(n) die henrick del haye/ doen sal aen lodewijken uuter helicht en(de) aen ja(n)nese calaber sec(re)tar(is) (et)c(etera)/ alse vander guedinghen van ii(½) mudde(n) corens erf(lic) pachts die de selve/ henrick heeft op zeke(re) goide te jandreing ghelege(n) toebehoren(de) den voirs(creven)/ lodewijken ende ja(n)nese Yerst sal de voirs(creven) henrick met sijnre moed(er)/ voir behoirlijke wethoude(re)n verthien en(de) opdragen de voirs(creven) ii(½) mudde(n) core(n)s/ en(de) dair inne goeden en(de) erve(n) den voirs(creven) lodewijke ende ja(n)nese met/ ghelufte van waerscapen It(em) sal de selve henrick t(er) vestich(eit) vande(n)/ waerscape(n) met eene(n) brieve a p(ar)t oick met sijnre moeder tonderpande sette(n)/
//
vier boender ghelegen te jandreingnoel dair inne mede/ bevurw(er)t sal sijn soe wa(n)neer met rechte bevonde(n) sal sijn dat/ derfgename(n) scotsaerts wijlen le cherf egheen rechte en hebben inde/ voirs(creven) ii(½) mudde(n) corens dat lodewijck ende ja(n)nes dan den voirs(creven)/ brief ap(ar)t te nyeute doen sullen It(em) oft derfgename(n) va(n) schotsaerts/ le chierf hen recht v(er)meten woude(n) aen de voirs(creven) ii(½) mudde(n) en(de) dat/ met rechte bedinghe(n) dat henrick dan mette(n) voirs(creven) lodewijke ende/ ja(n)nese p(ar)tije maken sal ende dat hulpen verantw(er)den totten ynde vanden/ rechte met allen bescheyde van brieve(n) oft and(er)ssins dat hij dair af hebbe(n)/ mach dair tegen dienen(de) Item de brieve vander guedinge(n) die henrick/ voirs(creven) heeft vanden voirs(creven) ii(½) mudde(n) corens metten ouden en(de) originalen/ brieve(n) sullen blive(n) ond(er) scep(enen) van loven(e) tot behoef van lodewijken uuter/ helicht en(de) ja(n)nes calab(er) t(er) eenre en(de) tot behoef henricx del haye t(er) ande(re)/ o(m)me elker p(ar)tijen te gebruyken(e) in rechte dair sijs te doene sullen hebben/ op caucie wed(er) om te bringen(e) Aldus geteekent Ita est ph(ilip)s de dyoen/ octob(ris) viii a(n)no lxxi Ita est willem de dyoen octobris viii a(n)no lxxi/ Ende de voirs(creven) p(ar)tijen tvoirs(creven) thonisse gheleyt sijnde huer sake gesloten/ hebben o(m)me tvo(n)nisse teysschen(e) als op in dijsdaghe lestleden welken dach/ op in dijsdaghe zonder recht [vacat] versteeken es op heden/ Ende soe es ghewijst dat de voirs(creven) henrick del haye den voirs(creven)/ lodewijke en(de) meest(er) ja(n)ne van des voirs(creven) es voldoen sal nae dat de/ wairheyt ghedrage(n) heeft cor(am) absoloens absoloens blanck(aer)t lynden/ novemb(ris) iiii[ta]