Cont zij allen lieden dat jan vander bruggen scepen(e) van loven(e) en(de) dieric briedere/ in jeghe was dat hemse? der scepen(en) van loeven(e) ghestaen hebben gheconsenteert en(de) ghewille/ coert deen den ande(re)n voir hen vore hen hoe(r) erfgename(n) en(de) nacomelingen de vorweerde(n) hier/ na bescreven van hue(r) beyden huysen gelegen inde steenstrate tusschen dander huys des voirs(creven)/ jans ende de pensstrate ierst heeft geconsenteert de voirs(creven) dieric dat de voirs(creven) jan met/ den voirs(creven) sinen huyse van beneden van gronde op opvaren sal moegen neven en(de) aelnast/ loetrecht neven den muer des voirs(creven) dierix ende dat de selve jan in des voirs(creven) dierix/ huys met eenen haysel va(r)en sal dwelc de voirs(creven) jan op sijne(n) cost aleen sal doen/ volmaken ende dat gedaen sal de voirs(creven) jan dat haysel opde sijde der strate(n) weert/ voert erffelic op sine(n) cost alse houden ende de voirs(creven) dieric sal tselve haysel op sinen cost/ des ghelijcx op de zijde achter ten hove waert erffelic houden en(de) dwater comende/ en(de) vallende achter vanden voirs(creven) haysel sal de voirs(creven) jan sonder des voirs(creven) diericx/ cost op sijn erve af leyden sonder arghelist hier over wa(r)en jan pynnoc de jonge/ en(de) arnt vinck scepen(en) van loven(e) ghegeven in jair ons he(re)n duysent vierho(n)dert/ en(de) eenentwintich de sevensten dach in julio
//
f(ilius) vid(elicet) pro augustino/ vanden velde Cor(am) buetssele/ thenis in vigilia jo(hannis) post/ nona(m)