Nae dien jan vand(er) hoeven rintmeester/ des edelen hee(re)n van chiev(re)s ind(en) q(ua)rtiere van/ aersschot comen es bijden raide vand(er) stad voe(r)/ den welcken hy ontboden hadde janne aeps/ gelaesmake(r) ende den selven te kynne(n) geven(de)/ hoe hy jan vand(er) hoeven voirs(creven) tanderen/ tijden met den selven janne aeps een co(n)tract/ aengegaen was te weten(e) dat hy janne v(er)cocht/ hadde een merrie met een(en) volen(e) en(de) noch/ twee ruynen op alsulcken vueghen dat/ hij jan aeps binnen twee ja(r)en naistcomen(de)/ maken soude gelasen werck totter so(m)men/ toe van xxxvi rinsg(ulden) toe welck de voirs(creven)/ jan vand(er) hoeven hem moeste bewijsen ter/ plaetsen en(de) plecken daert hem beliefde en(de)/ dat bynnen den twee ja(r)en en(de) in gevalle/ hy hem bynnen den twee ja(r)en egheen werck/ en beweese noch en dade maken soe soude/ hy jan zijn merrie en(de) ruynen v(er)liesen en(de)/ jans aeps soude die alsd(an) om niet hebbe(n)/ Seggen(de) dat voirs(creven) jan dat van desen/ contracten een cirograf gemaict was/ dairaff elck een dobbel hadde begherende/ daero(m)me achtervolgen(de) dien voldaen te/ wesen(e) van janne aeps voirs(creven) Seggen(de) oick/ dat hij hem tot div(er)schen stonden versocht/ hadde maten doen te nemen(e) en(de) dat hy dit/ altijt geweyghert heeft seggen(de) altijt/ dat hy noch wercks genoech hadde tot/ dat hy dat volmaict hadde en(de) aldus/ liet den tijt verstrijken en(de) de twee ja(r)en/ expire(re)n alzoe dat hy den voirs(creven) janne/ vand(er) hoeven luttel oft niet vele wercks/ gelevert heeft voer tsijne Seggende/ insgelijcx dat hy tot janne(n) aeps huys
//
comen es met notar(is) en(de) getuygen voe(r) despiracie/ vand(en) voirs(creven) tijde begherende en(de) hem noch noemen(de)/ zeke(re) vynsteren die hy begherde gemaict te/ hebben(e) al achtervolgen(de) den voirs(creven) cirografve/ Waer op jan aeps voirs(creven) seyde hoe hy een/ poerte(r) vand(er) stad was en(de) alzoe verre als/ de voirs(creven) jan vand(er) hoeven hem iet bethijde(n) woude dat hy dat dade ter plaetsen en(de)/ plecken daer dat behoirde te weten(e) voer/ meye(re) en(de) scepen(en) hy was de ghene die/ hem alsdan verantworden soude alzoe/ dat zijnen raedt gedragen soude declineren(de)/ alzoe vand(en) gerichte en(de) de rintmeester/ voirs(creven) sustineerde dat jan voirs(creven) sculd(ich)/ soude zijn voer den raide te antworden/ alzoe dat met terminacien gewesen wordden/ dat zij partyen versonden wa(r)en voir meyere/ en(de) scepen(en) ende dien achtervolgen(de) soe dede/ de voirs(creven) jan vand(er) hoeven den voirs(creven) janne/ aeps dach doen inde banck voe(r) meye(re) en(de)/ scepen(en) tegen den naisten daghe van rechte/ ende ten daghe van rechte dienende soe/ gaf hy jan vand(er) hoeven den voirs(creven) janne/ aeps voer een aensprake tghene des vo(r)e/ verhaelt es gelijckerwijs hy hem voirden/ rade aengesproken hadde seggen(de) alzoe/ verre als hy jan aeps voirs(creven) alsulcken/ aensprake bekynnen wilde tco(n)traect alzoe/ geschiet te zijne hy soude die waerheyt/ kynnen en(de) in gevalle van ontkynnen(e) soe/ presenteerde hy dat te thoen(en) En(de) dit/ by hem aldus bekent oft by hem gethoent/ soe concludeerde hy dat jans aeps hem/ geduempt soude wesen metten heeren/ vo(n)nisse alzoe vele wercks totter voirs(creven)
//
so(m)men toe te maken(e) oft dat hy dat selve/ soude doen maken totter voirs(creven) so(m)men toe/ ten coste des voirs(creven) jans aeps waerop jan/ aeps voirs(creven) antwoirde en(de) kynde datter/ een co(n)tract tusschen hen beyden alzoe geschiet/ was wair van een cyrograf was refereren(de) hem totten selven mair seide dat hij/ hem voldaen hadde achtervolgende den/ selven want hy hem noyt geweyghert en/ heeft eenich werck te maken(e) bynnen den/ tijde v ind(en) cyrografve begrepen ontkynnen(de)/ dat hy tot div(er)schen stonden alzoe v(er)socht/ es geweest en(de) open(de) hem zijnen thoon/ presenteren(de) oick te thoonen(e) dat hij/ jan vand(er) hoeven ierst comen(e) es tot zijn(en)/ huyse en(de) in zijnder absencien opd(en) lesten/ daghe en(de) uren vand(er) ixpiracien vanden/ voirs(creven) tijde ende dat metten voirs(creven) notar(is)/ en(de) getuygen vragen(de) zijnd(er) huysvr(ouwe) wair/ dat hy jan wa(r)e en(de) dat zijn huysvr(ouwe) hem/ antwoirde dat hy n(iet) thuys en was/ en(de) dat alsd(an) hy jan vand(er) hoeven voirs(creven)/ tot zijnd(er) huysvr(ouwe) seyde ic bringe hier/ notar(is) en(de) getuygen en(de) beghere achtervolgen(de)/ den co(n)tracte tusschen ons beyden gemaict/ dat hy dat achtervolghe en(de) my voldoen/ en(de) dat daerop seyde des voirs(creven) jans/ huysvr(ouwe) hoe h(er) rintmeest(er) comdy nu opd(en)/ lesten dach oft ure heeft u mij(n) man/ oyt eenich werck geweyghert Wair op/ jan vand(er) hoeven antwoirde neen hy seggen(de)/ insgelijcx alzoe verre als hy jan voirs(creven)/ dit bekynnen wilde hy soude die waerheyt
//
bekynnen en(de) in gevalle van ontkynnen(e)/ soe presenteerde hijt te thoonen(e) Ende/ dit aldus by janne voirs(creven) bekint oft by hem gethoent/ zoe co(n)cludeerde hy ter contrarien d(er) conclusie(n) des/ rintmeest(er)s voirs(creven) en(de) d(at) hy los en vry soude gewese(n)/ wordden van zijnen eyssche dwelc hem de/ rentm(eeste)r voirs(creven) ontkynde open(de) hem zijnen thoon/ en(de) nadien dat beyde de p(ar)tyen tot hue(re)n thoon/ gewesen wordden en(de) hue(re)n thoon geleyt hebben(de)/ soe hoopte jan vand(er) hoeven voirs(creven) genoech ghe/ thoont te hebben(e) om te co(m)men(e) tot zijnd(er)/ conclusien concluderende als vo(r)en wair/ op jan aeps voirs(creven) seyde dat hy jan m va(n)d(er)/ hoeve(n) [niet] genoech gethoont en hadde dat hem/ eenich scade doen mochte oft hem janne/ aeps onstade maer seyde dat hy selve/ ghenoech gethoent hadde om tot zijnder/ conclusien te comen(e) conclude(re)nde ter co(ntra)rien/ des voirs(creven) rintmeest(er)s co(n)clusie en(de) beyde de/ p(ar)tyen p(er)sisteren(de) in hue(re)n voernemen(e) en(de)/ conclusie begherden recht ende vo(n)nisse/ Alzoe dat ter manissen smeyers gewese(n)/ es met vonnissen nae aensprake a(n)tworde/ en(de) thoenisse van beyde de p(ar)tyen dat hy/ jan aeps sculd(ich) sal zijn den rintmeeste(re)/ alzoe vele wercks te maken(e) totter so(m)me(n) toe/ ind(er) cedullen bijden rintmeest(er) geexibeert/ begrepen oft dat hy jan vand(er) hoeven tselve/ werck by een(en) a(n)de(re)n gelaesmake(r) soudt doen/ maken tot coste des voirs(creven) jans aeps/ totter voirs(creven) so(m)men toe als dat die/ waerheyt gedrag(en) heeft cor(am) o(mn)ibus dempt(is)/ abs(oloens) graven dece(m)br(is) xiiii