Van henr(icke) colve/ It(em) het sijn come(n) in rechte voe(r) meye(r) en(de) scepen(en) van lovene henric/ boydens die ov(er)mids vo(n)nisse van scepene(n) brieve(n) van lovene beleyt es/ tot den goeden jan boelkens te(n)nenpotghiete(r) in deen side en(de) henric/ colve in dande(re) Daer de vorg(enoemde) henric boydens een aensprake dede/ ten vors(creven) henric colven w(er)t vande(n) huyse des dat den vors(creven) henric/ boydens toebehoe(re)nde es mids sinen vors(creven) beleyde ende dat was des/ des vors(creven) jan boelke(n)s gheleghen in de cortstrate ald(aer) naest den huyse/ des vors(creven) henrix colve segghende dat de selve henric colve met/ sinen huyse ende met sijnre ty(m)meringhe(n) dat hi van nwe nuwes/ ald(aer) heeft doen ty(m)me(re)n sinen huyse te nae gevae(re)n es en(de) te v(er)re/ over een veynste(r) neve(n) sinen schoersteen staende [en(de) met sine(n) hayssel en(de) wat(er)steen] meyne(n)de dat hi/ he(m) dat gebrec afdoen soude en(de) sculdich wae(re) af te doene Dat/ hi wael boet te thoene(n) dat hi hem te nae gevae(re)n wae(re) D(aer) op/ dat de vors(creven) henric antw(er)de en(de) dede lesen ene(n) scep(enen) brief inhoude(n)de/ seke(re) vorwerde(n) d(aer) mede dat de vors(creven) jan boelke(n) en(de) henric colve/ v(er)dragen wae(re)n doen de selve henric colve en(de) sijn huys make(n) dede/ in wat vuegen hi ty(m)me(re)n en(de) opvae(re)n mochte so Soe dat/ de scep(enen) nae aensprake en(de) antw(er)de en(de) [nae] al dats voe(r) hen come(n)/ was ghemaent vande(n) meye(r) van lov(en) wijsden voe(r) een/ vo(n)nisse wa(n)t de vors(creven) jan boelken en(de) henr(ic) colve deen den ande(re)n/ met hoe(re)n erve gerieft hadden dat dat alsulke(n) aensprake/ alse de vors(creven) henr(ic) boydens gedaen hadde tot henric colve w(er)t/ dat die den selven henr(icke) colve gheen onstade doen en soude/ Hier wae(re)n ov(er) lode(wijc) pynnoc henr(ic) vande(n) borch(oven) giel(is) de rike/ hubrecht van berthem jan h(er)tshals en(de) wout(er)e capellema(n)/ xiii dage in decembr(is)