Item int jaer ons he(re)n m cccc en(de) xxii [des dijsdaeghs] xiiii dage in julio es comen/ in rechte voe(r) meye(r) en(de) scepen(en) van loven(en) jan calabar die ov(er)mids vo(n)nisse/ van scepen(en) brieve(n) van loven(en) beleidt es tot den goeden adaems en(de) diederix/ bogarts gebruede(re) jegen janne grieten die te gade(r) met janne van stalle/ ende janne vanden elkelhoven beleidt es tot den goeden jans uuten broeke/ daer de voirs(creven) jan calaber een aensprake dede ten voirs(creven) janne grieten w(er)t/ metten selfsten worden inder substancien gelijc de voirs(creven) gebruede(re) met hoe(r)/ medep(ar)tyen die ten voirs(creven) janne van stalle janne vanden ekelhoven en(de)/ janne gryeten w(er)t voirtijts deden op de manie(re) dat sij inden vo(n)nisse/ hier voe(r) bescreven steet en(de) vande(n) selve(n) goede(n) daer in v(er)cleert ende/ ghenoempt Op dwelke de voirs(creven) jan grieten hem v(er)antwerdde/ seggen(de) dat voirtijts de voirs(creven) gebruede(re) met hoe(r) medep(ar)tyen vander/ selver saken in rechte gheweest hadden voer meyer en(de) scepen(en) van loven(en)/ daer doen t(er)tijt goede vo(n)nissen ov(er) gewijst wae(re)n die gheregistereert/ stonden inder scepen(en) boeke de welke sij begheerden datmen aenhoe(re)n/ soude ende dae(re)n teynden souden sij seker worde daer toe seggen die/ sij wisten (et)c(etera) dwelc geschiede Ende die vo(n)nissen aengehoert/ hoepte en(de) meynde de voirs(creven) jan gryeten na inhouden vanden voirs(creven)/ goeden vo(n)nissen ende na dat tot der saken voirtijts geschiet wae(re)/ dat alsulken aensprake als de voirs(creven) jan calaber gedaen hadde hem/ aen den voirs(creven) goeden gheen onstade en soude doen Also dat nae/ aensprake en(de) antw(er)de de meye(r) van loven(en) maende de scepen(en) van/ loven(en) wes recht sijn soude Die wijsden voer een vo(n)nisse dat sij/ bleven bij alsulken vo(n)nisse als de scepen(en) van loven(en) voirtijts daer/ op ghewijst hadden P(rese)ntib(us) joh(ann)e de huffle joh(ann)e de borchoven/ ludovico roelants waltero pynnoc walte(r)o cappelleman goessuino oude/ rogge et joh(ann)e ridder datu(m) ut sup(ra)