Vanden goitshuze s(inte) barbe(le)n dale te thienen/ Het sijn comen in rechte voir meye(r) en(de) scepen(en) van loven(en) jan vand(er) lynden/ van wohner wolmershem als erfgenaem otts wilen vander lynden in deen side ende jannes boydens als voirgeng(er) des goitshuys van sente/ barbelen dale te thienen in dander side dair de selve jannes/ boydens inden rechte lesen dede een guedinge uut scepen(en) brieven van loven(en)/ den voirs(creven) goitshuze gedaen van zeke(re)n goeden die waren gielis vander/ balct van wolmershem bege(re)nde en(de) versuekende dat men hem in sijnre/ guedingen houden woude welke goede hier na bescreven staen inden/ yrsten ii(½) dach(mael) lants gelegen achter nederlanden(en) opt heydeken tusschen/ de lande willem gielis en(de) jans wat(er)en It(em) i boender lants gelegen/ op de ca(m)medelle? tusschen de lande gielis scup(er)s en(de) jans vander lynden/ It(em) vi grote roeden lants gelegen opden wech daer men gheet van/ ov(er)wynde te landene w(er)t tusschen de lande pet(ere)n vanden berge en(de)/ vranck oliviers Item i dach(mael) lants gelegen tusschen overwynde/ en(de) ruymsdorp tusschen de lande gielijs cause en(de) machiels rike/ Item i dach(mael) lants gelegen opten wech daer men gheet van/ ov(er)wynde te landen(en) w(er)t tusschen de lande jans oelslege(re) en(de) gerarts/ sgreven It(em) (½) boender lants gelegen achter nederwynde tusschen/ de lande scloesters van partreys en(de) jans vander lynden voirs(creven) It(em)viii/ halster tarwen der maten van leeuwen erfs pachts die gielis vander/ balct voirs(creven) hadde op huys en(de) hof met sinen toebehoirten robbrechts/ roebens gelegen te nederwynde tusschen de goede henrics raspe des/ jongen en(de) de goede scloesters van partreys Dat gedaen dede seggen/ de voirs(creven) jan vander lynden dat otte wilen vander lynden sijn oem de/ voirs(creven) goede besat als sijn erve en(de) daer uut starf als uut sine(n) erve Ende/ dat hi de neeste levende we(re) van hem welke poynte hi boet te thonen/ en(de) metten minsten (et)c(etera) Ende seide so waer hi dese poynten gethonen conste/ dat hem de voirs(creven) goede volgen souden en(de) sculdich waren te volgen Daer/ op dat de voirs(creven) jannes boydens hem verandworde en(de) dede seggen dat/ hi hoepte dat die aensprake den goitshuze van sente barbelen dale gheen/ onstade doen en soude mids des(en) redenen want hi wel bethonen woude/ met wittiger waerheit en(de) metten minsten daer hi mede liden mocht inden/ rechte dat de voirs(creven) otte wilen vander lynden des voirs(creven) jans oem ov(er)
//
lange jaren voirleden(en) metten rechte gederft hadde de voirs(creven) goede voir hof en(de)/ he(re) daermen die af houdende is hoepte en(de) meynde so waer hi dese poynten gethone(n)/ conste dat hi met sijnre anspraken te hem w(er)t verdoelt wae(r)e en(de) dat hem die gheen/ onstade doen en soude Also dat na aenspraken en(de) andworden de scepen(en) van loven(en)/ gemaent vanden meye(r) wijsden voir een vo(n)nisse want hem beide p(ar)tyen thonisse/ vermeten hadden dat sij thonen souden en(de) dae(re)n teynden recht dwelc al geschiede/ voir sente jans misse Ende na den voirs(creven) s(ente) jans misse quam de voirs(creven) jannes boydens/ aen de he(re)n die voir s(ente) jans jans misse scepen(en) waren biddende en(de) bege(re)nde dat sij dese/ saken den scepen(en) nu tertijt sijnde aenbrengen wouden gelijc sij deden ende dat/ gedaen beg(er)de de voirs(creven) jannes boydens sijn thonisse te doen gelijc dat tvo(n)nisse/ gewijst hadde en(de) versocht onsen co(m)moingemeester dat hi hem brieve verlenen/ woude aen den meye(r) vander gheeten om sijn thonisse te hebben tot ene(n) zeke(re)n/ dage daer toe genoempt welken dach den voirs(creven) janne vander lynden gecondicht/ waert metter stat brieven om tvoirs(creven) thonisse te aenhoren en(de) metten rechte daer/ tseghen te allige(re)n oft hem gelieft hadde Ten voirs(creven) dage van thonissen bracht/ de voirs(creven) jannes boydens sijn waerheit te weten(e) twe vijnders vanden hove/ h(ere)n lybrechts van meldert in sinen hof te orsmale daer men tvoirs(creven) boender lants/ gelegen inde camdelle af houdende is en(de) twe vijnders vanden hove geheten/ pijlysers hof te nederwynde daermen de voirs(creven) viii halster tarwen af houdende is/ en(de) twe vinders vanden hove gielis vander balct te walsberge daermen af houden(de)/ is tvoirs(creven) dachmael lants gelegen tusschen ov(er)wynde en(de) ruymsdorp en(de) noch dander/ dachmael lants voirscr(even) gelegen opten wech daermen gheet van ov(er)wynde te/ landene(n) w(er)t De welke vinders te weten(e) elc twe vanden hove daer sij vinders af/ sijn droeghen op horen eet ten heiligen dat sij daer bi en(de) aen stonden en(de) daer/ ov(e)r waren als wisers daer otte vander lynden voirs(creven) der voirs(creven) goede derfde/ en(de) hem daer af ontgoedde metten rechte en(de) dat daer doen in gegoedt waert/ een jonck kint [des voirs(creven)] gielis soen vander balct met sinen momb(oere) en(de) dat des leden was/ also de vinders vanden tween hoven droeghen tusschen xvi en(de) xvii jaren en(de)/ de vinders vanden derden hove droeghen tusschen xv en(de) xvi jaren ende dat/ dat hoe(r) beste conde wae(re) Dat gedaen de meye(r) van loven(en) maende voert de scepen(en)/ van loven(en) die wijsden voir een vo(n)nisse na aensprake andworde thonisse en(de) na al/ dats voir hen comen was dat tgoitshuys van s(ente) barbelen dale voirs(creven) blive(n)/ soude in sijnre guedingen vanden voirs(creven) goeden also verre mense helt vanden hoven/ voirs(creven) daer hi metten wisers vanden selven hoven af gethoent heeft cor(am) huffle / joh(ann)e(m) borch(oven) roelants pynnoc cap(elle)[man] aug(usti) xxii