Van janne stamelart/ Het sijn comen in rechte inde banck voe(r) meye(r) ende scepen(en) van loven(e) henric/ catseurs die beleidt is tot allen den o(n)beroerliken goeden arnts wijlen smolders/ in deen side en(de) jan h(ere)nheyns diemen heet stamelairt van holsbeke in dande(re) Ald(air) de voirs(creven)/ henric catseurs hem becronende was vanden ongebruyke dat hem de voirs(creven) jan stame/ lart dede aen sinen beleyde aende goede h(ier)na bescreven Te weten aen enen hof/ geheten den zielmeshof gelegen te holsbeke tusschen de goede katelinen lyeminx en(de) de/ gemeyn strate aldaer It(em) aen een huys en(de) hof gelegen neven den voirs(creven) zielmeshof/ It(em) aen een dachmael lants gelegen acht(er) de kercke te holsbeke tuschen de goede m(ar)griete(n)/ jannes en(de) dlant der kynde(re) arnts wijlen smolders It(em) aen (½) boend(er) beemts gelegen/ aent kerchovervelt tusschen de goede der voirs(creven) kynde(re) en(de) [wijlen] arnts eeusel gehete(n) baws/ It(em) aen iii vierdel beemts gelegen op dynde vander langroden tusschen den beemt/ jans wijlen vanden eynde diemen hiet de rijcknape en(de) den beemt henric/ scusters It(em) aen iii vierdeel onder beemt ende torfpoele gelegen op de zicht/ neven den torfpoel gords wijlen vanden carnie(re) nu tertijt jans van rode/ versuekende dat hij in sinen beleide voirs(creven) vredelic bliven mochte Daer op/ de voirs(creven) jan h(ere)nheyns tot den voirs(creven) henricke catseurs een aensprake dede/ seggende dat de voirs(creven) goede comen wae(re)n vanden siden katlinen wettich wijf/ des voirs(creven) arnts smulders en(de) dat arnt en(de) katline sijn wijf de voirs(creven) goede besate/ alse hoe(r) p(ro)per erve ende dat daer katheline uutstarf alse uut hoe(re)n erve ende/ dat arnt daer inne bleef sittende als een tochte(r) en(de) dat hij de voirs(creven) goede/ gecregen hadde jegen de naeste erfgenamen der voirs(creven) katlinen van die(r) siden/ dat sij comen wae(re)n daer hij goede scepen(en) brieve van holsbeke af thoende/ die int recht gelesen wae(re)n welke pointe alle voirscr(even) hij boet te thoenen Voert/ seide hij dat tvoirs(creven) beleit hem ne(m)m(er)meer onstade doe(n) en soude want arnt de/ mulde(r) voirs(creven) wewer was doen tvoirs(creven) beleit gedae(n) was dwelc hij oec boet te thoene(n)/ D(air)op de voirs(creven) henric een v(er)antw(er)den dede met alrehande worden also dat de scepen(en)/ gemae(n)t sij(n)de wijsde(n) de p(ar)tien op hue(r) thoenen Ten dage van thoenen thoende de voirs(creven) jan/ stamelart allet ghene des hij hem v(er)mete(n) hadde en(de) de voirs(creven) henr(ic) catseurs niet Dat/ gedaen de meye(r) van loven(e) maende de scepen(en) die wijsden voe(r) een vo(n)nisse na ae(n)sprake/ en(de) tverantwerden en(de) thoenisse voe(r) een vo(n)nisse dat jan h(eren)heyns inde voirs(creven) goede bliven soude/ Cor(am) borchoven pynnoc calst(e)r(en) g(ra)ven lynden ouder(ogghe) et boys aug(usti) ult(ima) anno xxvi[to]