Van janne woute(r) ende henricke/ keyenoeghe gebruederen/ Tvonnise tusscen janne woute(r) en(de) henricke keyenoeghe gebruedere(n) die overmidts/ vonnisse van scepen(en) brieve(n) van loeven(e) geleyt sijn totten goede(n) henrix wilen smolders en(de)/ margrieten wilen sijns wijfs in deen sijde en(de) katlijnen marien en(de) ghertruyde(n) smolde(r)s/ sustere(n) des voirs(creven) wilen henrix in dande(re) Alse van enen halven boende(r) lants gelege(n)/ inde p(ro)chien van campenhout aen de stocstrate tusscen de goede henrix wile(n) vande(n) zijpe/ in deen zijde(n) en(de) denijs sijns brueders in dande(re) Item van enen stucskene lants gelege(n)/ opten cappellenhof tusscen h(ere)n jacops vanden zijpe priesters en(de) mercielijs willems Ite(m) van/ enen stucskene lants gelegen op tselve velt tusscen de goede peters vande(n) zijpe en(de) gords/ gielijs was gewijst met desen woirden dat den voirs(creven) gebruede(re)n keyenoeghs en(de) horen/ beleyde de voirs(creven) goede volghen sullen alsoe verre alst noch voe(r) de h(e)r(e)n dscepen(en) van/ loeven(e) comen wa(r)e p(rese)ntib(us) cor(am) eisde(m)