It(em) cond sij alle(n) liede(n) dat everart vande(n) savelpoele en(de)/ jan vande(n) savelpoele sijn brued(er) beyde wonen(de) bij s(en)[te] qui(n)tens/ sijn come(n) in jeg(ewordicheyt) d(er) scepen(en) van loven en(de) hebbe(n) genome(n) en(de)/ bekent dat sij genome(n) hebbe(n) ongesund(er)t en(de) onverscheide(n) [van hedewike(n) va(n) ophe(m)] ene(n) hof/ met ene(n) cleyne(n) beemde dair toehoe(re)nde gelege(n) te heev(er)le aen/ de moncmole(n) strate te houde(n) te hebben en(de) te wynne(n) van/ halfmerte naestcomen(de) enen t(er)mijn van neghen jae(re)n lang/ deen na dande(r) sonder middel volgende elx jaers dae(re)n/ bynne(n) [om] drie mudden rogs goet en(de) payabel met wa(n)ne en(de)/ veede(re)n wel bereyt d(er) maten van loven en(de) twee gulden/ rijders d(er) mu(n)te(n) ons gened(ichs) h(e)r(e)n des h(er)togen van bourg(oign)[en]/ en(de) van brabant alle jae(re) te s(en)[te] andries messe appostels/ te betale(n) en(de) te loven ten huyse des vors(creven) lodewijx jairlijx te/ leve(re)n den t(er)mijn due(re)nde en(de) telken t(er)mijn als v(er)volghde/ schout It(em) es vorweerde dat de voirs(creven) gebr(uedere) den vors(creven) hof
//
wel en(de) loflic meste(n) selen drie weerve(n) bynne(n) den vors(creven) t(er)mijn/ te weten te drie jae(re)n eens It(em) es vorweerde dat de vors(creven)/ gebr(uedere) den vors(creven) hof en(de) beemt wel en(de) loflic bevreedt sullen/ late(n) alsoe dat sij dien vynde(n) sulle(n) Ite(m) es noch vorweerde dat/ de vors(creven) gebr(uedere) de(n) vors(creven) hof int leste jair niet en sullen moge(n)/ hoervruchte(n) Ite(m) es noch vorwerde wae(re) dat sake dat de/ selve lodewijck de vors(creven) goede bynne(n) den vors(creven) t(er)mine weder/ omme hebben woude [om hem selve(n) te houden] dat hem dat de vors(creven) gebr(uedere) [hem dat] wed(er) sellen/ laten hebbe(n) op alsoe dat h deselve lodewijck den selven/ hen vernuege(n) sal van alsulke(n) coste als sij aen de selve/ goede geleeght sullen moge(n) hebbe(n) d t(er) taxacien van goeden knape(n)/ En(de) alle dese vorw(er)de(n) en(de) (con)d(icien) hebben geloeft (et)c(etera) lomb(ar)t abs(oloens) ja(nuarii) t(erti)[a]