Van arnde ghijsels/ Het sijn comen in rechte inde banck voe(r) meye(r) ende scepen(en) van loven(e)/ wouter van laethem die naeden rechte der stad van loven(e) geleit is tot/ allen den goeden jans van winxele geheten vierlinc in deen zijde ende/ arnt ghijsels in dande(re) Aldaer de voirs(creven) arnt ghijsels met zijnen gelev(er)den/ voerspreke een aensprake gedaen heeft alse vanden goeden hier nae gescreve(n)/ Inden yersten een half boender beemts gelegen te westerle aenden dijck/ metten eenen eynde tusschen de goede jans hovene(re) en(de) mychiels van olme(n)/ Item een huys ende hof met eenen halven boender beempts en(de) onderhalf/ boende(r) lants en(de) alle(n) ande(re)n zijnen thoebehoerten [geheten] tverstoerde block gelegen/ inde selve prochie tusschen de porte van westerle in deen zijde ende/ de nerhem strate aldaer aen dande(r) zijde Item vii dachmale lants/ ghelegen aende hersstrate aldaer tusschen de goede henricx jaecx op/ deen zijde ende arnt ghijsels op dande(r) zijde Item een vrierde(r) lants/ ghelegen tusschen de goede des jonche(re)n van wesemale aen deen zijde/ ende de goede des selfs jonch(e)rs op dande(r) zijde en(de) jans van ontsele aende/ derde zijde Item een dachmale lants gelegen te westerle op dlempoeld(er)/ velt dwelc wijngaert plach te zijne tusschen den molenwech gaende/ ter tonge(re)n weert aen deen zijde en(de) mychiels van olmen op dande(re)/ Item een huys ende hof met schue(re)n stallen ende bachuysen ende/ ande(re)n zijnen thoebehoerten gelijc dat dat gelegen is te westerle/ aent ryet aldaer op in deen zijde ende de strate gaende ter ryet/ weert aen dandere Item een huysken metten hove en(de) alle(n) ande(re)n zijne(n)/ thoebehoerten gelegen aende goede peters panhuys aen deen zijde ende/ de goede jans de cupe(re) op dande(re) Item vii lopen rox erflicx op de goede/ vrancx vander voert gelegen te zoerle inde voirs(creven) prochie geheten de/ rosendonc aen deen zijde jan van wolputte op dande(r) zijde en(de) de/ derde sijde aen mackenbroeck Item eenen wyngaert te hersele opden/ smyssen berch gelegen aen de goede der kynde(re)n rademake(r)s op deen/ zijde en(de) der kynde(re)n berbers bertels aen dande(re) Item vii roeden/ wyngaerts gelegen dae(r) neven inde selve prochie van hersele/ Item drie rynsche gulden(en) erfliker renten te kersmesse te betaelen/ op huys ende hof met zijne(n) toebehoerten houden(de) drie dachmale/ luttel myn oft meer bertels vanden ve goe(re) gelegen te hersele/ tusschen de hersstrate op deen zijde ende de goede lambrechts vand(er)/ lynden aen dande(re) Item eenen rynsche(n) gulden erflic op een stuck/ lants geheten den berch houden(de) een half boender den selven berthelmeeuse/ toebehoe(re)nde ghelegen tusschen janne vander ghalen ende dygne luyx/ / Item twee hollansch gulden(en) erflic op ende aen hulsterbosch houden v(½) boender/ lijsbetten van berssele toebehoe(re)nde gelegen tusschen de goede gielijs vertruden/ ende wouters smeye(r)s Item eenen mottoen erflic op huys ende hof ydeken/ van doerne gelegen te hersele aende plaetse aldaer tusschen de goede/ reyners de coste(re) ende lijsbeth mondekens Item drie sillen lants gelege(n)/ te gestele tusschen de goede henricx ty(m)mermans aen deen zijde ende/ de goede oliviers beckers in dande(re) Item eenen wijngaert die houden(de)/ is willem marien gelegen te berchem aen derve hennen jannes op/ deen zijde ende de goede des voirs(creven) willems marien in dander zijde/ Segghende dat de selve arnt ghijsels een wettige suster hadde geheten/ juete dochter jans wilen ghijsels welke arnt ende juete wettighe/ kynde(re)n wae(re)n des voirs(creven) jans Segghende voert dat herman gheronx/ der voirs(creven) jueten ontscaecte ende daer nae waert met consente van/ hue(re)n vrienden tusschen den voirs(creven) herma(n)ne en(de) jueten een huwelick/ getracteert met alsulker vorwerden oft de voirs(creven) juete aflivich worde/ sonder wettighe oer vanden voirs(creven) herma(n)ne te hebben dat dan nae/ hue(re)r beyder doot de stockgoede der voirs(creven) jueten gaen souden ter/ zijden waert van daer die afcomen wae(re)n ende oft zij tsamen e(n)nige/ goede vercregen dat dan die nae hue(re)r beyder doot half en(de) half gaen/ souden daer die sculdich wae(re)n te gaene Op welke vorweerden doen/ tertijt de huwelijc voertganc hadde Ende oft des niet en hadde mogen/ geschien oft voertganc hebben soe hadde dan de huwelic achtergebleven/ Seggende voert dat der bancken recht wae(re) daer de voirs(creven) goede sijn/ gelegen soe wa(n)ner man ende wijf e(n)nighe goede tsamen vercrigen/ dat tvierdel daer af met die yerst sterft ewech gaet en(de) dat die/ lanxste leven(de) dande(r) drie deele van dien goeden tot zijnre tocht/ behoudt ende besidt alsoe lange als hij leeft Ende dat tvoirs(creven) half/ boender beempts der voirs(creven) jueten stocgoede wae(re)n Welke poenten/ de voirs(creven) aert boet te thoenen ende met mysten (et)c(etera) Op dwelc de/ voirs(creven) wouter hem verantweerden(de) seyde dat hem noch zijne(n) beleyde/ die aensprake egheen ontstaede doen en soude bij reden(en) want den/ schoutbrief die de voirs(creven) herman bekynt hadde gedaen wae(re) in geheelen/ stoele ende daer nae wart dbeleyt geschiet Soe hoepte hij dat hem/ ende zijnen beleyde de voirs(creven) goede(n) volgen souden ende dat de voirs(creven)/ houweleke voerweerde hem daer inne negheenssins en souden moegen/ / contrarie(re)n al waert alsoe dat den voirs(creven) huwelic voe(r) dbeken vanden voirs(creven)/ schoutbrieve geschiet wae(re) ende dat de voirs(creven) herman en(de) juete de/ voirs(creven) goede vercreghen in gelyken stoele Seyde oic dat ne(m)mermeer/ man hem souden moegen verlonen in goeden die hij noch te v(er)crighen/ hadde Seyde voert dat soe wa(n)neer man en(de) wijf die alsoe e(n)nige/ goede vercregen wel macht hadden nae der bancken recht daer/ die zijn gelegen te vercoepen en(de) te goeden Welke poenten de voirs(creven)/ wouter boet te thoenen ende metten mynsten (et)c(etera) Hopende mydts dien/ oft hij dat gethoenen conste dat hem ende zijnen beleyde de voirs(creven) goeden/ volgen souden ende des geliefde hem wael tvo(n)nis Nae den welken/ de scepen(en) van loven(e) worden gemaent vanden meye(r) die wijsden/ voe(r) een vo(n)nisse beyde de voirs(creven) p(ar)tien tot hue(re)n bethoene Ten daghe/ van thoenen thoende de voirs(creven) arnt ghijsels met goeden mannen/ die bijden huwelijc wae(re)n allet ghene des hij hem in zijnder aensprake(n)/ vermeten hadde Daer nae thoende de voirs(creven) wouter dat den voirs(creven)/ schoutbrief bekynt waert in ghehelen stoele ende dat de voirs(creven) h(er)man/ ende juete de voirs(creven) goeden tsamen vercregen en(de) dat zij die besaeten/ als hue(r) propre erve Thoende voert met vier scepen(en) dat soe/ wa(n)neer man en(de) wijf die alsoe goede vercrigen wel macht hadden/ nae hue(re)r bancken recht die te derven ende te verthie(re)n behoudelic/ eenen yegeliken zijnen rechte nae den welken de scepen(en) gemaent/ vanden meye(r) wijsden voe(r) een vo(n)nisse nae aensprake verantwerden/ ende thoenissen van beyde p(ar)tien dat de voirs(creven) wouter aen tvoirs(creven) half/ boender beempts als stocgoede ende aen de helicht vanden ande(re)n goeden/ met zijnen beleyde verdoelt wae(re) alsoe verre alst noch voe(r) scepen(en)/ comen wae(re) P(rese)ntib(us) pynnoc rijke abs(oloens) witte overwynghe septe(m)br(is)/ quinta a(n)no xiiii[c] xliiii