Also onlanx peterken sone vranx wilen helscheviers in hachten/ gestelt es mits dat twee van zijnen magen aenbrachten dat hij den/ eenen getranseneert hadde [en(de)] den ande(re)n gedreight eenen royen hane/ over zijn huys te seinden dair op de hee(r) den vors(creven) peterken ter/ stranger examinacien begheerde te hebben ter p(rese)ncien vand(er) stat/ gedeputeerd(en) die hen dair bij gelieven soude te stoken Ende de stat/ den vors(creven) peterken app(ar)t hebben hue(re)n spreken en(de) met worden ernstelic/ geexamineert die de fayten geheelijc ontkynde mair seide dat de/ voirs(creven) aenleggers zijn mage hem hadden alle beide te diversen/ stonden zo geslaghen zoe anders te cort gedaen dair af dat peyse/ en(de) pointinghe van goeden mannen gemaect wae(re)n en(de) al waest dat zij/ hem yet gegheven mochten hebben dat was geweest alleen tghene/ des hem ind(er) selver pointingen was aengeseeght voir zijn mesdaet/ te hebben en(de) dat dat waer was en(de) dat hij oic alo(m)me inder gebuerte(n)/ dair hij gewandelt en(de) gewracht hadde stont en(de) gestaen hadde ter / goeder namen en(de) samen en(de) was gheweest van goeder en(de) huesscher/ wandelingen dat boden hij en(de) sijn vriende te thoenen Hopende dair/ om dat hij [hem] dae(re)nboven p(ri)vate p(er)sone die hem niet lief en hadde also/ niet belasten en consten hij en soude van hue(re)n aenbringhen en(de) des/ hem die hee(r) woude bethiden gestelt wordden te rechte en(de) te/ vo(n)nisse voir meye(r) en(de) scepen(en) van lov(en) inde banc te voirder/ want hij der stat poirte(r) wae(r) en(de) dair p(rese)nteerde hij te verbeiden/ en(de) te volcomen allet ghene des met vo(n)nisse over hem soude/ worden gewijst hopen(de) dair met te gestane Soe es hier op/ bijden raide vand(er) stat gehoert geweest al int lange al tghene/ des ten vors(creven) aenbringen van circonstancien en(de) and(er)s mocht diene(n)/ desgelex tghene des de vors(creven) peter en(de) sijn vriende geboden/ hadden te thoenen die huers vermets wel en(de) volcomentlijc/ volquamen Ende vort bij rypen rade en(de) advise dien navolgen(de)/ overdragen en(de) getermijneert voir recht dat de vors(creven) peterken/ tot gheender examinacien in desen comen en sal mair gelieft den/ meye(r) hem aentespreken dat hij dat doen sal voir hem en(de) [de(n)] scepen(en)/ inde banc en(de) met rechte oft den selven ontslaen cor(am) heminge(n)/ marcels burgim(a)g(ist)ris et pluribus aliis de [tam scab(inis) q(uam)] consiliar(iis) augusti/ xxiiii