Alsoe als voermaels tusschen janne vanden hove sone/ wilen jans ende augustijne coreken als man ende/ momboir zijns wijfs dochte(r) bernarts wilen van ker/ berghen zeke(re) appointemente gemaict sijn alse van/ zulker lijftocht alse de voirs(creven) wilen bernart voirtijts/ met scepen(en) brieven van loeven(en) gecregen hadde tegen/ den voirs(creven) janne vanden hove staende mede ten live/ van des voirs(creven) augustijns wive dochter des voirscr(even)/ bernarts dair voe(r) de selve jan de voirs(creven) augustijne/ geloeft heeft voer scepen(en) van loeven(en) de so(m)me van
//
veertich rijders dair op hij bekinde gehaven te hebben/ drientwintich rijders ende vanden seventhien rijders/ versocht ende begheerde de voirs(creven) augustijn betalinghe/ te hebben oft daer voe(r) den voirs(creven) janne vanden hove/ ende sijn borghen gehouden in hachten Dair op de/ voirs(creven) jan vanden hove hem verantwerden(de) seyde dat/ hij hoopte dat hij noch zijn borghen niet gehouden zijn/ en souden aengesien dat de voirs(creven) augustijn bekynde/ dat de voirs(creven) geloifde so(m)me qua(m) spruytende uut oft/ ocsuyne der voirs(creven) lijfpen(sien) ende want hij voirt verstae(n)/ hadde dat de p(ri)ncipale brieve der voirs(creven) lijfpen(sien) den/ voirs(creven) augustijne ongereet wae(re)n ende zijn wijf dier/ de selve lijfpen(sien) mocht toebehoe(re)n van hem sate en(de) zij/ int gheestelijc recht tegen malcande(re)n dinghden op huer(er)/ beyder sceydinghe dair mede zij hem ghedreycht hadde/ de voirs(creven) lijfpen(sien) noch hier naemaels te eysschen dat/ hij van sijnen pe(n)ninghen niet sceiden en soude die vors(creven)/ augustijn en soude hem goede caucie doen dat hij/ met eender betalinghen mochte gestaen Ende dat/ gedaen p(rese)nteerde hij ter stont trest voirs(creven) vanden vors(creven)/ xvii rijders hem op te legghen hopende dair mede/ te gestaene zunderlinghe nae tghene dat de/ selve jan vanden hove oic cleerde dat van deser/ saken voe(r) de stat voertijts was verhandelt Soe/ wart hier op bijden raide vander stat p(ar)tien al int/ langhe gehoirt voer ooghen gheleecht des voermaels/ hier af was gedaen ghet(er)mineert dat de voirscr(even)/ augustijn den voirs(creven) janne noch zijn borghen niet
//
praemen en soude moighen metter voirscr(even) geluften/ vander voirs(creven) so(m)men voer and aend(er)re tijt toe dat/ hij hem alsoe sterck maecte dat hij den voirs(creven) janne/ vanden hove de p(ri)ncipale lijftochtbrieve geleveren/ conste oft dat hij hem sulke caucie ende borchtocht/ soude moeten setten dat de voirs(creven) jan vande(n) hove/ te vreden mocht wesen wordde hij naemaels vander/ voirs(creven) lijfpen(sien) gepraemt dat hij wiste volcomelijck/ hem te v(er)richten In pleno (con)silio februar(ii) xiii