Tvonnisse vanden gedinge dat gheweest is inde banc voir meye(r)/ en(de) scepen(en) van loven(en) tusschen henricke huldegarden van velthem/ els geleit na deser stat recht tot behoef zijn selfs en(de) tot behoeff/ gielis cardenaels tot allen den goeden have en(de) erve he(re)n jans/ van quaderebbe prieste(r) voir zeker en(de) doeghdelic gebrec dat sij/ met scepen(en) brieven van loven(en) hebben dwelc sij p(rese)nteerde(n) hue(re)n/ eedt te verifice(re)n in deen zijde en(de) den vors(creven) he(re)n janne in/ dande(re) Aldair de voirs(creven) geleidde vortvoe(re)n met rechte ende
//
verclaerden hue(r) gebrec meynen(de) dat met hue(re)n eedt scepen(en)/ brieven aen des vors(creven) h(ere)n jans goede te verreiken en(de) alss de/ selve her jan zijn goede verantweerden zoude versochten de/ vors(creven) geleidde dat hij eene(n) borge int recht want hij priester/ wa(r)e setten soude d(air) hij niet bereet toe en was mair nam/ d(air) toe dach op heden als ten naesten dage dair hij quam/ mair noch gheenen borge en hadde en(de) seide dat hij/ e(n)nige zijn vriende dair toe hadde gesproken die niet/ en quamen en(de) oftse niet en quame(n) so v(er)socht hij noch/ d(air) toe eenen ande(re)n dach te hebben Dair na worde/ en(de) wederworde ten uutersten gewijst was wair de vors(creven)/ her jan hem also sterc en maect dat hij met rechte/ dingen mach dat dan de voirs(creven) geleidde en(de) hue(re)n beleide/ thue(re)r schout behoeff de vors(creven) goede volgen sullen zoe/ verre sij die thue(re)r eedt verificerden P(rese)ntib(us) scabinis/ in scampno febr(uarii) xvi

It(em) navolgen(de) desen dede(n) de vors(creven) henric huldegarde(n) en(de) giel(is) cardinaels den eedt dat hue(r) wettich/ scult zonder de coste(n) van rechte ind(er) sake(n) geloepe(n) gedroech xii(½) rijders dwelc gedaen de scepen(en)/ gewijst hebbe(n) den vors(creven) eedt volcomelijc gesciet te sijne cor(am) o(mn)ib(us) scab(inis) in sca(m)pno dept(is) neth(enen) oud(erogghe)/ febr(uarii) xx